كتير مننا بيشتكي ان البيت صغير ومش متوضب سيراميك ودهان عادي ومعظم البيوت المصرية عندها مشكلة قلة الامكانيات وقلة المال لتوضيب البيت لان فيه طبعا اولويات
والمعظم بيقول اننا بنرتب والبيت مش بيبان عليه وكلام من ده
وكتير كتير لوك لوك وويك ويك=كلام ستات يعني
المهم انا واحدة من الناس دي وبحمد ربنا والله وبقول انا في نعمة
بس انا دايما بنضف البيت وايدي فيه اول باول وطبعا بما اننا كلنا عاوزين بيوتنا نضيفة وجميلة لان ده بيشعرنا بشكل عام براحة للنفس والهدوء والانتعاش وممكن كمان التجديد فالكل بيسعى انه ينضف ويوضب البيت عشان بيتنا دايما يبئا نضيف وكمان عشان لما حد يجي منبئاش منزعجين عشان ميقولش على بيتنا مش نضيف اوي اي حاجة جوا نفسيتهم انا دايما اهم حاجة عندي المطبخ
وما ادراكي ما المطبخ بدولابه بشفاطه ببوتجازه بسلاطته ببابا غنوجه
المهم
انا استعنت بالله وسميت بالله واول حاجة عملتها اني هبيت الحيطة يعني جبت مقشة ولو عندك زعافة يبئا اشطة وشيلي العنكبوت اللي في السقف والجدران
بعدها قومت منزلة الشفاط طبعا الشفاط عبارة عن موتور ومروحة اللي هي الريش والوش انا بجيب الريش والوش واقوم نقعاها في مية وكلور واسيبهم منقوعين واجيب الموتور واجيب حتة سلكة الومنيوم صغننة كده واجيب طبق صغنن واحط فيه ملح لمون وشوية خل وماية دافية وصابون سايل وامسك حته حته اشيك اشيك ومعايا سكينة وفرشاة سنان قديمة عشان اشيل الزيوت من الحتت المزخنقة وحتة قماشة وامسح بعدها والله بينضف وبيكون زي الفل واشطة
امو هند بعد ما اخلص وههو حوالي بياخد نص ساعة تنضيف على حسب طبعا كل شفاط ودرجة تشوهه من الزيوت والغبار وخلافه
اموهند=المهم
بجيب بئا الريش والوش اللي نقعاهم وهاتك يادعك ويانسف لحد لما يبئازي الفل
انشف بئا واجيب الريش والفها بورق فويل=ورق حراري
نيجي بئا للبوكس اللي بيتحط فيه الشفاط انضفه واليفه واجي عند مواسير الغاز والعداد انضفه والف مواسير الغاز بورق حراري كله لو اللي مكنتش بتحط ورق حراري سابقا تجيب كوز بوهيه بلاستيك ب9 جنيه زي الفل وتدهن المواسير ولما تنشف تلفه بئا ومترميش بقية البوهيه هقولك نعمل بيه ايه تاني بس استني عليا شوية طبعا ده في يوم واحد وكفاية عليكي كده عشان اصلا الواحد متمرمط باقي اليوم متنسيش ان فيه عيال وطبيخ وترتيب باقي البيت
دي بئا صورة شفاطي والمواسيربتاعة الغاز

اللي لسة مدخلين غاز جديد هيلاقوا ان العدادصغير عن العدادات السابقة وطبعا مفيش كافر مقاسه فانا فصلت كافر عداد على ايدي مقاسه
ومحدش يتريق هوعلى اد لحافي وعلى اد افكاري

انا بقالي ست سنين متجوزة في البيت ععلى نفس الدهان
خلاص بئا نكمل شغلنا
تاني يوم نزلت شباك المطبخ ودخلته الحمام ونضفته بالليفة وصابون اللسايل وشطفته وركبته تاني وخليت ماماتخيطلي ستارة للمطبخ بس تكون قطن وقومت علقتها هي حاجة بسيطة بس منها تغيير ومنها نحسس اننا عملنا حاجة جديدة
ودي صورتها



بعدها عملت طبق فيه صابون سايل وكلور ونزلت كل الرشاقة كوبايات بئا واطباق
طبعا هتلاقوا عندي اطباق صاج اصل جوزي اللافندي بيحب ياكل في الصاج قعد يعايرني اني مجبتش في شواري صاج عار طبعا عليا وصيت امي تجيب اطباق صاج سيرفيس صاج خليه يعرف ياكل


دايما نحاول نجدد ونفكر ونبتكر في المطبخ عشان منشعرش بالملل نحيته دا انا اعرف ناس حاطة تلافزيون جوه المطبخ اه والله

نرجع بئا لقصة الكفاح المريرة للمطبخ

نررررررررررررررررررررررررجع لمرجوعنا
المهم طبعا انتي لسه عندك الطبق اللي كنا حاطين فيه صابون سايل وكلور اووعي تكبيه عشان لسه هننقع فيه حاجات
السباتة نفككها بعد ما نفضى كل محتواياتها في اطباق ننقعها في الطبق اياه ونغسلها ونسيبها تتصفى ولو عندك اطفال ناديهم ينشفوا شغليهم واشغليهم بدل ما يقعدوا يزنولك ويقرفوكي
نيجي بئا لترتيبها المعظم بيعين في السباتة الاكياس القديمة فانا بارجوكم متعينوش الاكياس لانها بتجيب صراصير

اشتري ربع كيلو شنط واستخدميه مش غالي وانضف من اننا نحوش ونجمع وف الاخر نكسب صرصار هدية
المهم نشفتي السباتة لازم تتنشف كويس عشان الحاجة اللي بيكون فيها رطوبة بتبئا مستنقع للصراصير
رصيها بئا زي ما انتي عاوزة وحاولي انك تستغليها اسوا استغلال
انا عندي دولاب مطبخ صغير 120سم فبستغل كل حتة وكل مكان بالمطبخ يعني انا عاملة رف واحد بس للبطاطس والبصل
ورف لفوط المطبخ والمساكات والمرايل وكده يعني
ورف تاني للسكر
ورف لاكياس المكرونة لو جبتي بئا بتنجان بطاطة اي حاجة موسمية بنحطها معاها ميضورش المهم النظام والترتيب
الرف ده فيه بصل وبطاطس والتاني فيه السكر كل كيس سكر بلفه بكيسة عشان النمل وبربط الكيس كويس وبرصه بنظام مش عارفة الصورة مش واضحة ومعتمة ليه
ده بئا رف الفوط والمسكات

ده بئا رف اكياس المكرونة اللي حكتلكوا عليه حاطة فوق السباتة برطمان للزهرة الزرقة والبرطمان التاني فيه بيكربونات صوديوم بستخدمه في الغسيل الابيض بيخليه زي الفل وانا حاطة حاجة الغسيل ع السباتة عشان عشان الغسالة جنبها على طول

الغسااااااالة
انا غسالتي فوق اتوماتيك عندي بقالها 4 سنين وطبعا عندي المجري عشان مش بستغنى عنها وخاصة لما بيكون الغسيل كتير احطها في الحمام واعمل احلى فولكلور شعبي واغسل غسيلي ولا فيش مثيلي
وبعد مابخلص غسيل في الغسالة المجري بليفها من برة وانشفها كوييس جدا والبسها الكافر الخاص بيها واعينها في المطبخ مش الحمام لسببين السبب التالت ان البرومة هتاكلها ده غير ان الحمام صغير
امو هند ارجع للغسالة الفوق اتوماتيك طبعا ليفتها من برة ومن جوة ونشفتها ولبستها الكافر الخاص بيها وبئت فل




دي بئا الغسالة المجري استغلتها اسوا استغلال وحطيت عليها السخان الكهربا

 

 

التلااااااجة كنت فصلتها عن الكهربا قبل ما اجلها يجي بساعة عشان اعرف اغسل الفريزر
فكيت الفريزر من التلاجةوشيلت التلج وحطيته في الحوض وجبت اطباق وحطيت فيها الخزين اللي كان في التلاجة وقومت تيك تيك بيئ بيئ =سرعة في الاداء والانجاز
نضفته في فسوة عشان الحاجة اللي مخرجاها متبوظي بنضف قوام قوام وقومت منشفاه وراصة خزيني ببنظام وترتيب بحيث ان كله يكون في متناول ايدي اقفلي بئا الفريزر
وانزلي بئا للتلاجة تحت رصي حاجتك على الرخامة كلها مع ترتيبها بمعنى ان في حاجات طبعا في التلاجة مالهاش لازمة ازازة دوا منتهي صلاحيتها طبق جبنة جضض من السقعة والنشفان نرميه مش مشكلة طمطماية ضربت واتهبلت ارميها كده يعني وياما في التلاجة مفاجاءات

ولازم نعمل 3 ايام ف    الاسبوع ننظم فيها تلاجتنا واي عكاية نلمعها ونمسحها اول باول
المهم فضيت التلاجة وخدت رف رف اغسله وانده لالاء حبيبتي تنشف تموت وتنشف
المهم بعد ما غسلت الارفف اروح بئا للتلاجة من جوة اغسلها ومنساش الزخنيق تتنضف بفرشاة الاسنان وبعدها ارص الارفف وارتب حاجتي بنظام
مننساش نحط حتة فاحمة او شوية بيكربونات في سرة من الدنانير عشان تمنع وتشفط اي ريحة في التلاجة
تحذير اياكي وفرش مفارش ده بيحرق الموتور لان المفارش بتمنع وصول غاز الفريون لجميع انحاء التلاجة والدول العربية

ممكن نفرش مفارش بكشل سمبوكسي صغير كده عشان يبئا في فتحات تهوية
رتبي اكلك يا موزة وحاولي تخلي الاكل الدسم ورا بعيد عن متناول ايدك عشان غية كل واحدة فينا تفتح التلاجة وتقعد تعس على اكل وتقف تاكل وتضرب من هنا طفاسة وانا زيكم ويمكن امر منكم بس انا بحاول الم نفسي بئا بيتي اتخرب من كتر الاكل بكل زي الحمار في النجيلة لا الحمار بيشبع ولا النجيلة بتخلص
واليكم شكل تلاجتي بعد تنضيفها

 

 

البوتجااااااااااز
انا اهم حاجة عندي بالمطبخ البوتجاز احب بوتجاز مفيهوش نقطة زيت نشفة في ركن من اركانه
المهم باختصار كده هقولكم انا نضفت بوتجازي ازاي
دخلت ع الفرن حطيت حلة مية جوة الفرن وولعت الفرن بالحله عشان البخار يساعد على تنضيف الفرن اطفي الفرن بعد ما يعرق كده ولما يبرد حبة افتحيه ونضفيه بالليفة والصابون السايل وحتة قماشة وجردل مايه جنبك وامسحي هيبئا زي الفل طبعا الررف

عاوزة تستخدمي جيف او باور او اي منظف مستر ماسيل مضورش خالص تعددت الاسباب والتنضيف واااااحد تغسليه ع الحوض بالسلك اعملي بئا جردل ماية وفيه ما تشتهيه الانفس من بيكربونات خل ملح ليمون صابون سايل وحطي بئا عيون البوتجاز وحملاته
وهاتي منه بالليفة ورغي وادعكي البوتجاز بازازه ضهر ووش وقفا والبوتجاز بئا من الجناب كله كله متخليش حته الا لما تدعكيها ممكن تدعيكه كده بس من غير فرن ولا حمالات ياخد نص ساعة دعيك
امو احمد عشان ام هند تعبت
تمسحي بئا بعد ما دعكتي
وتقعدي كده ع الارض وتستربعي وتمسكي عين عين تخليهم زي الفل لان عيون القلب سهرانة مبتنمش
المهم الحملات بئا تجيبي سكينة وده لستات اللي مش بتغسل حمالالتها اول باول وتشيل الزيوت المتراكمة اللي في الحمالات
انا مش عاوزاكي تيجي على نفسك انا ممكن اخد في البوتجاز يومين عشان اعمل كل حته فيه بزمة وضمير

جرجريه لقدام عشان نشوف الحيطة بتاعتنا
انا عن نفسي معنديش سيراميك وكلامي هيكون موجه للي مش عاملين سيراميك
انا بحط على طول ورق حراري ع الحيطة عشان الحيطة اللي مش فيها سيرايك بيشرب الزيت وبيكون شكلها وحش جدااااا
فالست الشاطرة اللي مش حاطة ورق حراري تدهن الحيطة بكوز البوهيه ايااااه ولما تنشف الحيطة الزقي الورق الحراري ع الحيطة وانقعي الارض اللي تحت البوتجاز بشوية ماية كلور صابون سايل طبعا مش تغريقا والارض لو عطشانة زي ما بتيجي كده تمسحي وتبلي يعني بلل بسيط بلاش بركة البط في الفيوم واديها ادي بالله عليكو انا سايبة المطبخ ع البلاط بتاع الحاكومة عشان احنا على طول غرقانيين بسبب الغسالة الفوق اتوماتيك كل شوية تغرقلي المطبخ فشيلت المشبع وخليتني على البلاط تجنبا للغرقان واتباعه
ودي صورة البوتجاز


في رف كده صغير غلبان يعني حاطة فيه 3 برطمانات فيه ما تيسر من ملح وفلفل وكمون وده طبعا بنستخدمه على طول وقت ما بنيجي بنطبخ فحطاهم برة الدولاب عشان مزيتش دولابي المهم يعني انا مسكت الرف ببرطمانته ونقعتهم وغسلتهم وخليتهم زي الفل ونشفتهم ورجعت كل حاجة مطرحها
ده صورة الرف(غلبان خالص)

 

 

 

 

 

 

 

استعينا ع الشقى بالله
دولاب المطبخ
هنمسك رف رف
انا عندي الدولاب زي ما قولت من شوية انه صغير 120 سم
نص فوق ونص تحت
النص اللي فوق الغالب فيه برطمانات من بهارات لاعشاب لحبشتكأت
وكمان حاطة الخلاط بتوابعه
الخلاط ده طبعا لازم يتنضف حتة قماشة مبلولة بالخلطة اللي بالنا فيها اللي هي ملح ولمون وبيكربونات وشوية صابون سايل وخل وماية دافية وحته حتة بالخلاط وزخنوقة زخنوقة ونضفها بفرشاة الاسنان بتعمل احلى واجب والله  ونخلية ابيض شاهق
ونيجي للبرطمنات ناخد سطر سطر ونفضي محتوياته في ورق كراريس على اي تربيزة سفرة على ملاية ونفرشها ع الارض ونحط عليها الورق ده ونقفل الاوضة عشان العيال ميلعبوش فيها وكل واحدة ونظامها والاسلوب اللي يريحها المهم تجيبي البرطمانات وننقعها في الطبق اللي ذكرناه من قبل ونغسل وننشف كويييييس اووي واتك اوي على الحتة دي عشان اللي مش هتنشف كويس حاجاتها هتعفن انا قولت اهو
وهكذا وهلم جرجر الى ان تنتهي من سطور البرطمانات كلها وتركينه على جنب وتجيبي مفارش الدولاب ده لو عندك مفارش بلاستيك معندكيش اضربي الدولاب ورق جرايد ولا يهمك او ورق ملازم اي حاجة تفرشيها يعني بس لو مفرش بلاستيك لازم يكون ناشف مش مندي عشان الصراصير بالله عليكم يعني اغسلي المفرش هويه نشفيه كويس جدا وقبل ما تفرشي تكون طبعا نضفتي الرف بتاع البرطمانات ورشتيه بودرة نمل وصراصير وياحبذا يا سميحة يا اوختي لو عملتي عجينة صراصير وتدفسي في اركان الدولاب بالعجينة واليكم صورة رف البرطمانات بتاعتي




في بئا درفة في الدولاب اللي فوق عملاها للشفاشق والكوبايات الطويلة قليلة الاستخدام طبعا بعدها كل البعد عن الرشاقة عشان الزحمة والخنقة والاكسجين
انا خدتهم برضو نضفتهم وعملت معاهم الواجب زي ما عملت مع اخواتهم وبرضو نضفت مفارشهم ورجعت رصصتهم كلهم تاني واليكم الصورة



نيجي بئا للادراج انا عندي درجين ميتين
واحد بحط فيهم المعالق والشوك والذي منه
والدرج التاني بئا رفايع المطبخ من شمع لمفك مقص كبريت ورفايع المطبخ كتيرة وحدثي وبلا حرج




واليكم الدرجين من بعد تنضيف زي الارفف بالظبط








ننزل بئا لبقية الدولاب تحت
انا عاملة رف للحلل ورف للعلب البلاستيك صواني تقديم على صواني طبخ على المصافي وكده واشي خراطة ملوخية على ايه تاني يا بت يا هدى نسيت المهم هرفع الصورة وانتوا شوفوا وطبعا تنضيفهم كما ذكرت في السابقة


وطبعا انا حاطة الحلل اللي باستخدمها بس والباقي حطاه تحت السرير في كراتين وراصهم ومغلفاهم بكياس ومن حين لاخر لما باجي انضف تحت السرير بفتح الكراتين واطمن عليهم لو الكرتونة جت فيها صرصار او ماشبه برمي الكرتونة واجيب كرتونة تانية وبرش عليها بودرة صراصير وارص فيها حاجتي
المهم انك لما تنضفي رتبي ورصصي ونظمي والحاجة قليلة الاستخدام عنيها تحت السرير وخاصة السراير الصغير لان لو عوزتيها وده لوووو واحتمال ضعيف وقلما ما يحدث يبئا سهل عليكي انك تقلبي تحت السرير الصغير بتاع الاطفال وتطلعيها
اشطه كده
نيجي بئا للدرفة اللي جنبها  كده عندي درفة طويلة ومش هبلة
عبارة عن رفين
الرف اللي فوق عملاه للمنظفات من معطرات لصابون سايل لكلور لفلاش بتاع الحمام لمسحوق غسيل اي اداة من ادوات التنظيف يعني



المهم
الرف اللي تحته عملاه للخزين جردل سكر جردل روز ازايز الزيت الخل وكفاية ده رف هو مخزن





المهم انك كل ما تنضفي حته تمسحي وراها وحتها وكده ويعني وقلبي بيوجعني
ولما خلصت كل جزء بالمطبخ نقعته في ماية وكلور وصابون سايل قليل قليل قليل ياااااولدي برضو متغرقيهاش يعني بفرشة البلاط واديله ادي ادي اديييلوه
وبكده يكون المطبخ خلص وانا خلصت وفرفرت
تابعوني عشان هوريكم الدولاب بتاع الاطفال يترتب ازاي ويتطبق ويترص ويتنظم هدوم الاطفال ازاااااي
تاااااااابعوني

Posted in: تنضيف وتنظيم المطبخ بالصور