Twitter Delicious Facebook Digg Stumbleupon Favorites More

السبت، 30 يوليو 2011

طريقة سهلة لمسح الارض والبلاط وكمان انضف م الخيشة والشرشوبة بالصووووووووووووووووووور

السلام عليكم ورحمة الله وبركاته


زي ماعودتكم اني دايما باجيب الجديد ومش شرط ان الفكرة تكون جديدة عليكم لاني عارفة ان كل ست مصرية ممتازة وشاطرة بس باقول جديدة يعني ما طرحتش في النت قبل كده
يعني حصري واصلي
وطبعا انا بس بارفع الصور والافكار لافادة الناس اللي عاوزة تعرف وانا عارفة ان في ناس شاطرة عني كتير وبردودهم انا باستفاد منهم حاجات كتير
الجديد النهاردة اني هاتكلم عن مسح البيت وخصوصا اننا في الصيف كلنا بنقلع البيت وبنعريه عشان الحر والسيراميك بيجيب طراوة حلوة وطبعا دا بيتعبنا من نحية كل شوية ماسكة مقشة او شرشوبة وعمالة تنشضفي وتلمي عشان السيراميك دايما يكون نضيف وطبعا في ناس كتير مش بتعرف توطي وتمسح وكمان الشرشوبة دي برضو مشروعها فاشل وكمان بتستهبل ولا بتنضف ولا حاجة كل دورها انها بتجيب الزبالة يمين وشمال (وتلييط الارض)..............طبعا مصطلح تلييط دا مصطلح بورسعيد وممكن يكون انتشر في المحافظات اخرى نظرا للعولمة المنتشرة في وقتنا الحاضر

ودي صورة الشرشوبة

 وطبعا لو عملوها ايه هي برضو اسمها لكلوكة وبتلكلك البيت



ودي شوفتها وانا في السوق لونها بنفسجي برضو ماتحاولش معايا برضو بتلييط الدنيا

ومش عارفة مين اللي واقف بيتصور وراها ده محسسني انه بيتباع مع الشرشوبة





نيجي بقى للطريقة
اولا انتي هتجيبي مقشة خشنة وتكون زي دي ومعلش هي متمرمطة حبتين عشان قديمة عندي بقالها 7 سنين



  وتجيبي جينرال او ديتول معطر مسيح اي حاجة انتي تمسحي بيها وممكن كلوركس اللوان خالتي كانت بتستخدمه وانا جربته هايل في المسيح بس جينرال بيعمل عمله وبيسلك مسلكه وتحطي منه نقطة في الارض اللي هتنضفيها وطبعا الارض دي هتكوني انتي اصلا كنساها بالمقشة ولماها من اي ورق واي حاجة عشان تمسحي على نضافة




 ممكن بقى لو عندك سيراميك تجيبي شوية ملح لمون وتقومي حطاهم في الفوارق بتاعة السيراميك











وبعدها تجيبي مقششتك الخشنة وتغمسيها في جردل الماسة وتفضلي تحكي السيراميك وتوزعي نقطة الجينرال في الارض وملح اللمون وقتها هيدوب في فوارق السيراميك وتسيبي الاوضة دي اكنها منقوعه حبة في في ملح اللمون وتروحي تعملي العملة دي في اوضة تانية لحد ما تحسي انك نقتي البيت كله مش ناقص غير انك تنشفي وتمسحي
ساعتها المسح هيكون سها وهتنشفي على طول مرة واحدة من غير ما كل شوية توطي وتعصري وشوية تبلي لا تنشفي والكلام ده



 بعدها تجيبي فوطة المسيح بتاعتك وياحبذا لو كانت فوطة
ولييييييييه؟
عشان الفوطة بتشرب اكبر كمية ماية وباحس انها مسيطرة وملمة بالمنهج بعكس اي قماشة كتان او بافتة او فلنة سي اللافندي جوزك الحاجات دي استخدماتها ممكن في تلميع الموبليا او الشبابيك او ازاز بس مسح الارض عليكي وعلى الفوطة القديمة بتاعتك
في حاجات طالعة في السوق ممكن تشتريها بس اتاكدي انها قطن وخامة كويسة ولو حسيتي انك مش هتفلحي تشتري يبقى عليكي وعلى اي فوطة كبية محترمة تمسحي بيها وتون كبيرة كده
الفوطة دي كبيرة مش صغيرة
باشوف ناس تمسح الارض بحتة قماشة اد كف ايديها طبعا دي تتنفخ عشان تمسح بيها ارض


طبعي في الاول والاخر
كل واحدة تمسح بالطريقة اللي تعجبها وتريحها وتناسبها
ماهي الا فكرة بتريحني كتير
وخصوصا لما بيجي عليا ايام كل يوم بامسح البيت بسبب اني لامة السجاد وطبعا العيال عندي مش بيحبوا يلبسوا شبشب في البيت دا غير اللي على طول بيحبي في الارض

الخميس، 28 يوليو 2011

الاستعداد لرمضان بالزينة

السلام عليكم ورحمة الله وبركاته
انا الحمد لله اشتريت الفانوس ابو شمعه اللي كان نفسي فيه وبيفكرني بطولتي
واشتريت احبال نور عشان اعلقها في البيت وكمان ع الشباك
وزي ماعودتكم اليكم الصور
دورت على قماش الخيامية في بورسعيد مالاقيتهوش وبرضو كان نفسي فيه


 ودا سجاد الصلاة غسلته وعطرته

الثلاثاء، 26 يوليو 2011

نضفني شكراااااااااااااااااااا (وفتحت ابواب الجنة)

السلام عليكم ورحمة الله وبركاته
كل عام وانتم بخير بمناسبة الشهر الكريم

ايام قليلة وتعد ساعات قليلة لمجئ الضيف الكريم شهر تفتح فيه ابواب الجنة وتغلق فيه ابواب النار وتسلسل فيه الشياطين هو شهر رمضان الكريم

  • طبعا احنا خلصنا تنفيض الشهر اللي قبل رمضان واللي لسه ما خلصتشي تخلص واللي لسه ما ابتدش اصلا باقولها وبكل نرفزة اومال كل ده بتعملي اييييييييييييييه
  • عاوزين نعمل ايام راحة قبل رمضان بيومين يعني مانفضلش ننفض ونهد حيلنا حتى يوم الرؤية
  • عاوزين نجهز للصلاة وخصوصا صلاة التراويح وخصوصا للي بتنزل تصلي في المسجد ربنا يتقبل منها ومنا صالح الاعمال طب نجهز للصلاة يعني نعمل ايه؟؟؟؟؟؟؟
يعني نجهز اسدال صلاة وياحبذا لو جديد ويكون قطن كده عشان الحر ويكون شيك
أسدال الصلاه اسدلات الصلاه للسيدات




أسدال الصلاه اسدلات الصلاه للسيدات

نجهز ازازة شاور ويكون ريحته حلوة عشان قبل الصلاة تاخدي شاور كده محترم تطري بيه على قلبك وجسمك



حضري شراب جديد اسود
طرحة جديدة
وطبعا كل واحدة وامكانياته في الشراء وربنا يوسع ارزاقكم يارب

طبعا باسألأكم وبسأل نفسي نفس السؤال قبلكم:
ليه شغل البيت ده؟
ليه التحضيرات والتجهيزات دي؟

هل عشان نتفرغ للعبادة والطاعة ولا عشان نتفرغ للافلام والمسلسلات والبرامج التافهه ولا عشان نستمتع بعروض التليفون ونفضل نرغي باقل سعر طوال اليوم ولا عشان نقعد ع النت ولا ولا ولا؟  عاوزين نكون صرحة مع نفسنا ومع الله عز وجل


هل احنا تعبنا عشان نجمع حسنات ولا عشان نجمع سيئات؟

كلنا عارفين ان الشهر ده تضاعف فيه اللحسنات والسيئة بالسيئة؟
ولازم نحط في اعتبارنا ان ده شهر الرحمة والمغفرة

عارفين ان السلف الصالح كانوا يفضلوا يدعوا طوال ال6 اشهر ان ربنا يبلغهم رمضان وال6 اشهر الباقيين ان ربنا يتقبل منهم اعمالهم في رمضان (شوفتوا اد ايه الشهر دا غالي)
(وَسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ) (آل عمران:133) ... 

طيب الايام الباقية دي ننصح بعض بايه ولا نعمل ايه
كلنا نفسنا نصوم ونعبد ربنا في رمضان ونبعد عن المعاصي بس يوم وبنرجع تاني نتابع حلقات رمضان من تاني يوم وبيفوتنا الحلقات الاولى وفي ناس بتشوفها في الاعادة

طبعا لازم نستحضر النية ولازم نكون متمرنين ع الطاعة عشان ما يحصلش زي ما بيحصل اول يوم ومات الكلام وانتحر الحوار
نتمرن بالنية الصالحة نقعد مع نفسنا نمرن انفسنا ع النية الصالحة
  • نية التوبة .....التوبة من المعاصي والذنوب
  • نية قراءة القرآن
  • نية الصيام
  • نية بر الوالدين
  • نية صلة الرحم
  • نية الصدقة
  • نية الاحسان بالزوج وطاعته (واتك فيها شوية عشان كلنا بصراحة...............)
  • نية زكاة الفطر
  • نية الاحسان للجار
كل الكلام دا جميل واشطة
طب استحضر النية دي ازااااااااااااااااااااااااااااااااااااااااااااااي:
*يا اما نقعد مع اخوات صالحات يذكرونا بالطاعة الدائمة وبلاش جارتك اللي تفضل تحكيلك المسلسل حلقة بحلقته ولا تحكيلك على جارتكم اللي فوق اللي لما جوزها طالعلها شايل ومحمل كل يوم ولا ولا وال ولو مافيش حواليكي اخت صالحة تعينك ع الطاعة عندكم التلافزيون اسمعوا درس اسلامي او شاهدوا قناة اسلامية والقنوات الاسلامية الجميلة اللي بتدخل قلوبنا بالهبل وبرامجها كلها احلى من بعضها

*نداوم على الصلاوة الخمسة وخصوصا صلاة الفجر

*قراءة القرآن

*المواظبة على السنن

*الذكر والتسبيح والدعء لنفسك ولبيتك ولاسرتك واموات المسلمين ومرضى المسلمين ولا ننسى بالدعاء لزوج ياقوة حرة وكمان الدعاء لاختنا هايدودي وباقي اخواتنا وحبايبنا هنا بالجروب

كلها طاعات والله سهلة وبيها ربنا بيبارك في الوقت وهي يا اما عبادة باللسان او بالجوارح وفي هذا فليتنافس المتنافسون
احنا في شهر رمضان كسبانين كسبانين اوعي تخرجي م الشهر مفلسة دا شهر واحد في السنة اوله مغفره  واوسطه رحمه واخره عتق من النار
عارفين معنى عتق من النار؟؟؟؟؟؟؟؟؟؟ دا الواحدة فينا بتتلسع م البوتجاز تفضل تولول يارب اعتقنا وارحمنا من النار

كمان عاوزين نعين بعض في الطاعة
احنا ماشاء الله كلنا هنا بنحب بعض في الله ولله
لا بيجمعنا مال ولا قرابة ولا جيره ولا غيره لكن بيجمعنا حاجة اهم اسلامناااااااااااا
صحبتي وحبيبتي هي اللي تاخد بايدي للجنة وتعني ع الطاعة
الطاعة هي الجنة والمعصية اعوذ بالله النار
اللهم اجمعنا على الطاعة
وبسم الله انا شايفة فيكم كلكم الخير والالتزام ودا اللي شجعني على الكلام
واعترف اني اقلكم في الطاعات والالتزام واملي في الله ثم فيكم انكم تاخدوا بايدي الى الجنة




عاوزة بقى في نهاية كلامي اعرف ايه جدولكم في رمضان يعني طول اليوم بتعملي ايه
عشان نتعلم من بعض ومش عاوزين لحظة للشيطان

ياريت ينفع اعرف اعمل مسابقة بس المسابقة دي هحتاج اني اشوف قلوبكم وماينفعش اطلع على قلوبكم غير ربنا عز وجل
ودي تحضيرات
لرمضان في الجزء السابق




دا التين المجفف


رد: نضفني شكرااااااااا (9) اللهم بارك في شعبان وبلغنا رمضان
ودا ازبيب

رد: نضفني شكرااااااااا (9) اللهم بارك في شعبان وبلغنا رمضان
ودي المشمشيةوالارصيا
رد: نضفني شكرااااااااا (9) اللهم بارك في شعبان وبلغنا رمضان
داجوز مبشور
رد: نضفني شكرااااااااا (9) اللهم بارك في شعبان وبلغنا رمضان

رد: نضفني شكرااااااااا (9) اللهم بارك في شعبان وبلغنا رمضان
نيجي بقى للفشايق بتاعة العصاير
رد: نضفني شكرااااااااا (9) اللهم بارك في شعبان وبلغنا رمضان

رد: نضفني شكرااااااااا (9) اللهم بارك في شعبان وبلغنا رمضان
ودي برضو ازايز للعصاير

رد: نضفني شكرااااااااا (9) اللهم بارك في شعبان وبلغنا رمضان

رد: نضفني شكرااااااااا (9) اللهم بارك في شعبان وبلغنا رمضان
ودي برطمانات للبهارات ماما جابتها جديدة لانها لاقت ان عندها عجز في البرطمانات لما اشترت بهارات جديدة
رد: نضفني شكرااااااااا (9) اللهم بارك في شعبان وبلغنا رمضان
ودا التمر كسرته بمدقة التوم وعبته في البرطمان الكبير ده
رد: نضفني شكرااااااااا (9) اللهم بارك في شعبان وبلغنا رمضان

بعض من اللينكات الهامة

السبت، 23 يوليو 2011

تنظيم الياميش بشكل مظ وجميل بالصور


دا التين المجفف


ودا ازبيب

 
 ودي المشمشيةوالارصيا
 داجوز مبشور

 نيجي بقى للفشايق بتاعة العصاير

ودي برضو ازايز للعصاير


 ودي برطمانات للبهارات جديدة لاني لاقيت ان عندي عجز في البرطمانات لما اشتريت بهارات جديدة
 ودا التمر كسرته بمدقة التوم وعبته في البرطمان الكبير ده

الأربعاء، 20 يوليو 2011

تنضيف الشباك الشيش بالصوووووووووور

السلام عليكم ورحمة الله وبركاته
طبعا كلنا بنبتدي ننضف استعدادا لرمضان وكمان عشان العيد لما يهل علينا ما نتعبش وما نقلبش البيت في رمضان زي ما احنا متعلمين من خلال نضفني شكرا
طبعا من الحاجات اللي لازم نهتم من بنضافتها كل فترة هي الشبابيك عشان بتلم تراب كتير وكمان من الصعب على ناس كتير انها تغسلها وهي متركبة فبتضطر انها تفكها وتغسلها في الحمام
نيجي للصور

طبعا الحمام متبهدل بسبب كمية التراب اللي فيه

طبعا انا باخد الشيش اكب عليه ماية الاول
 وبعدين بالصابون السايل وقليل من الماية وبالليفة وباغسله
 وبعدها باشطفه
 ودي الصور بعد الغسل
طبعا البوهيه فيه متقشرة عشان الشباك قديم
مش مشكلة المهم انه نضيف


طبعا الجديد بقى الموضوع التقليدي
كيفية المحافظة على نضافة الشباك عشان مش كله مرة تلفحي الشيش على كتافك وتشدي بيها للحمام
طبعا كل اسبوع بتمسكي اوضة اوضة تلمعيها تهويها تشفطي مراتبها وتمسحيها وتهوي سجادتها وبتنسي تلمعي الشباك ولو افتكرتي بتلمعيه من جوا بتنسي تلمعيه من برة
لا عاوزاكي تلمعيه من بره ومن جوه
الشيش من برة هتلاقيه محمل بالتراب والقرف معلش اعملي حتت قماش وقماشة ورا قماشة وشيلي الرمل
ويا مكتر القماش بتاعة التلميع عندك ولمعي وارمي وكله بيجي برزقه
كده انتي تقدري تحافظي على نضافة الشباك اكتر من 6 شهور مش هاقولك للعيد
وربنا يعنكم
وكل سنة وانتم طيبييييييييين

السبت، 2 يوليو 2011

ازاي نوفر في ازايز الصابون السايل

موضوع مهم اوي لازم نحط في عين الاعتبار وهو اننا نوفر في الصابون السايل وازاي نستخدمه وايه اللي نستخدمه
طبعا بداية لكلامي احب اقول اننا لازم نبتعد كل البعد عن الصابون السايل السااااااايب لانه لا يسمن ولا يغني من جوع فعلا تفضلي تشتري في الاسبوع الواحد ب2 جنيه وتقولي انك بتوفري وبتشتري السايب الرخيص بس لو جيتي حسبتيها هتلاقي انك بتصرفي في الصابون السايل اكتر من الاخت اللي بتجيب صابون سايل محترم
واللي شبه الصابون السايب وبيتباع في ازازة ام بزبوز اللي ازازة الفل برضو دي سيئة زي السايب
واللي اعلى منه كفاءة حاجة بسيطة الفيبا زمان اول ماطلع الفيبا دا كان بجد ممتاز بدأ المصنع يقلل من كفاءته الرغوية كنت ارغي الليفة بس ترغية اليف بيها المواعين كلها  وكلمة تلييف دي كلمة بورسعيدية وانا مش بافرض ثقافتي عليكم لا انا ضد العولمة انا ضد العولمة

المهم بقى عشان ما اطولش عليكم  انكم تجيبوا صابون سايل اسمه ايه واد ايه في الشهر وازايتوفروا فيه
معايا يلا ع الصور
اولا نوع الصابون السايل يا فيري يا بريل
دي ازازة الفيري اللي هي الحجم المتوسط باجيبها والله بتقعد معايا شهر مع اني بانفض على طول وطول اليوم باغسل مواعين ومعايا 3 عيال وسي صابر يعني عيلة تعتبر مش قليلة يعني (ماشاء الله لا قوة الا بالله )
والله على ما اقوله شهيد دون مبالغة في كلامي واللي هتمشي ورا كلامي هتشوف الفرق باذن الله ووقتها هتعرف اني مش ببالغ

 دا عرض بتاع بيرل عملاه جبته قعد معايا شهرين و10 ايام بجد الازازة كان فيها بركة وربنا مبارك فيها
 نيجي بقى نتكلم عن المهم برضو وهي نوع الليفة او السفنة اللي بتليفي بيها المواعين وطبعا دا بيفرق في التوفير جامد السفنجة اللي في الصورة دي ربنا يولع فيخا بجد مشروع زبالة والله لانها لا بتنضف ولا بيقعد فيها الصابون ولا بترغي ولا اي حاجة حاشفة وناشفة دي بلاش نجيبها اساسا دي نطوخها ونرميها مقتولة
 دي طبعا نفس السفنجة اللي فوق اختها مع اول ما تتبل يحصلها كده تفيييس كده ولا يبقى ليها لا شكل ولا منظر عِرة يعني ومن غير ما تطوخيها هي انطخت لوحدها
 طيب نستخدم ايه ؟
نستخدم السفنج الحلو المطغوط مش الخرع زي اسكوتش برايت بتاعة زمان الحلوة دي اللي تحطي فيها نقطة البريل تلاقيها تفضل مرغية معاكي لحد ما تنضفي بيها كل المواعين بنقطة واحدة زي ماقال الاعلان بتاع شيرين ولا شريف والحاجة رجاء الجداوي رضوان الله عليها
دا نوع من انواع السفنج
Premiere Pads Large Cellulose Sponge | Office Supplies & Home Office Supplies

ودي ام حته خضرا وخشنة من فوق
Clorox® S.O.S® Heavy-Duty Scrubber Sponge | Office Supplies & Home Office Suppliesوتمسكي الاسكوتش كده تضميها بايدك كل ماتحسي انها بتنضمي بسهولة تعرفي انها تفيس اول ما يتحط عليها ماية


كلامي بقى هيتوجه للسواحلية وحبايب السواحلية
صلوا ع النبي عارفين الغزل بتاع الصيد نوعين
اللي هو البني ده دا حلو اوي في التنضيف وبيرغي جامد وبيحتفظ برغوته مع اول نقطة بيريل او فيري بس عشان بيدي على حرير باحسه مش اد كده وفي ناس بتستخدمه في الاستحمام ودي صورته

 دا بقى الغزل بتاع الكابوريا والاستكوزا بجد ممتاز في الاستحمام والمواعين هايل هايل هايل ودا اللي انا باستخدمه عن نفسي مش باشتريه وباخده من ناس معارف صيادين بدل ما يرموه بعد ما بيتقطع ومش بينفع انه يترقع ويصطادوا بيه تاني بيستخدموه في كده
ودي صورته

وانا الهدف من الموضع الافادة وليس المبالغة ويارب اكون قدرت اوصلكم معلومتي
واللي تحب تضيف اهلا بيها عشان انا كمان اتعلم
وجزاكم الله كل خير

 
Design by Free WordPress Themes | Bloggerized by Lasantha - sherif alnaggr | Blogger Templates | تعريب وتطوير : شريف النجار