شرح تنضيف المعالق والسكاكين وفوط المطبخ بالصور مع هدى سمير

السلام عليكم ورحمة الله وبركاته 

هاتكلم عن تنضيف حاجات بسيطة ومنا بيتجاهلها او مش بياخد باله منها 

وهي مش هتاخد وقت وبتفرق معاكي بتحسي براحة نفسية لما بتشوفيها نضيفة 

لازم كل اسبوع تعملي جردل او طبق صغير على الحوض وتحطي فيه ماية سخنة اوي م السخان وشوية بريل وشوية كلور وحبة خل 

وتنقعي فيهم الكوبايات بتاعتك وبالاخص الكوبايات بتاعة الشاي اللي بتكتسب لون غامق من الشاي وكمان المعلقة بتاعة التقليب
وكمان تنقعي المعالق الخشب لان دي من حين لاخر لازم تتعقم
وكمان السكاكين والمقشرة اليدوية بتاعة البطاطس
احرصي ان اي حاجة من الحاجات دي مالهاش لازمة ارميها
وظبطي درجك او صفايتك على اللي بتستخدميه بس
اي زيادة عنيها بعيد عن اللي بتستخدميه
خليها بس ع الاد
بشوف عرايس حاطة معلقتين كبار ومعلقتين صغيرن ف الصفاية وهم دول اللي بتستخدمهم والباقي سيباه جديد ف الدرج 

 المعالق 

دا بيكون شكلها مع الاستخدام المستمر او لما بتغسليها وبتعنيها ف الدرج من غير تنشيف 

 بتنقعيها ف الماية اللي حكيت عنها فوق وبتسيبيها شوية لحد ما تغسلي مواعينك وتنضفي مطبخك ترجعي عليهم تغسليهم بس بالليفة هتلاقي المعالق اكنها جديدة وزي الفل
ولما يجي ضيف او ضيفة تقدمي الشاي ومعاه المعلقة ما يكونش لونها متغير وعليها طبقة لون مطرح الشاي القديم او حتى جوزك مش شرط ضيف 
كمان لازم يكون عندك معالق جديدة متعانة للضيوف وكمان كوبيات وكاسات خاصة بيهم وكمان صنية ليهم (ودا موضوع تاني هاكتبه عن الاتيكيت ف التقديم )

السكاكين 

السكاكين دي بئا كارثة 

شايفين المنظر دا موجود عند ناس كتير وبيكسلوا انهم ينضفوها واكن المنظر دا ضروري لحمو السكينة

دا بيتنضف وربنا يا اما بالنقع بتلاقي الوسخ بيدوب 

اول يا اما بفرشاة سنان خاصة بتنضيف الاواني 

او بالليفة عادي بس تعالي شوية على الحتة دي 

الكوبايات

لو ماكنتش على الصفاية زي اللولي وتنور المطبخ برونقها يبئا دشيها وارتاحي منها احسن

نقعك ليها كل اسبوع من غير حك بالاسكوتش ولا بالسلك الالومنيوم زي ما بسمع من البعض هتخليها زي الكريستال الحك دا بيعمل ف الازاز خدوش بيخلي شكل الكوباية تييييييييييت

قماش التلميع

او الحتة زي ما بيسموا البعض ...او (الخرقة ) اللي منهم ناس بيفتحوا حرف الخاء ومنهم اللي بيكسرها وبيكون متحدث للعربية بطلاقة 

حتة القماشة اللي بتكون دايما ع الحوض بتلمعي بيها الاسطح الخاصة بالمطبخ (رخامة الحوض ..التربيزة ....البوتجاز ..وغيرها )
دي لازم في نهاية شوط نقع الكوبيات والمعالق والسكاكين والادوات 
لازم بعدها تنقعي الحتت دي وهي كفاية حتة بس ولو في حاجة مطرح تلميع الشقة برة انقعيها هتنضف وهتبئا زي الفل 
لازم تتهوى مش عشان هي بتاعة المطبخ يبئا اسيبها ع الحوض تلم بكتريا وقرف وبعدها شطفة تحت الحنفية وامشي انشر البكتريا ف المطبخ كله :( 

لازم تخلي حتة القماش دي نضيفة وشياكة واناقة 



دا انا بغسلها وكمان بعطرها 

ومش اي حتة قماشة بحطها على الحوض لازم يكون شكلها شيك 

باحرص اني اشتري الحتت دي من محلات اتنين ونص اللي ماعدتش باتنين ونص 


فوط المطبخ 

اسمع ناس تقول اعرف الست النضيفة من فوطة مطبخها

غير اننا بنحرص على اننا نختار اشيك واحلى الوان لفوط المطبخ لازم نحرص على نضافتها
يعني مش عشان هي فوطة المطبخ افضل مطلعة عين امها وما اغسلهاش الا لما تستغيث والوانها ومعالمها تروح خالص 

واخيرا وليس بأخرا

لازم المعالق تتصفى كويس قبل ما تتحط ف الدرج 

اي استنلس عاوزة تحافظي على رونقه ولمعانه لازم يتنشف كويس جدا