تنضيف اوضة النوم حتة حتة بالصوووووور

هارجع من جديد واتكلم عن تنضيف كل حتة في البيت باذن الله
واول ما هابتدي اتكلم عن تنضيفه
هي اوض النوم
وطبعا اوض النوم يا اما اوضتك انتي او اوضة العيال لو فيه ودايما بتكون هي اوضة المعيشة

اوضة نومك
طبعا بغض النظر اننا طبعا هنضفها ودا اللي هالحق بيه كلامي
عاوزة اقول ان اوضة نومك دي هي اللي بتعبر مدى حبك واهتمامك بزوجك
ولازم بعد ما تنضفيها تحطي لمساتك الخاصة بيكي اللي بتعبر عنك وعن زوءك الخاص بيكي

لو جينا نتكلم عن تنضيف اوضة النوم
وهمسكها حتة حتة باذن الله
اولا السقف والحيطان
لازم نهتم بتنضيف السقف والحيطان
انا دخلت بيوت تقريبا عمرهم ما مسكوا ليفة وغسلوا بيها الحيطان للاسف
فاحنا لازم نزعف الحيطان بالزعافة ونشيل العنكبوت وكده دورنا ما انتهاش
لا لازم كمان نشوف الاماكن اللي ايدينا بتيجي عليها وبتبقع ومن ثم شكلها بيكون مش نضيف

طيب والحيطة من فوق اللي مش بنطوله ساعات بيكون مدي لون مغمق دا سيتك تراب لازق ولازم يتغسل بصابون سايل وماية ويتشطف
وهي انك تجيبي جردل ماية وفيه صابون سايل وتجيبي مقشة خشنة او مقشة عادية او الزعافة اي حاجة وتغمسيها في الجردل وتقومي تحكي الحيطان من فوق اللي مش بتطوليها (ودا بينطبق معاكي في كل الاوض لان مش اوضة النوم بس اللي فيها حيطان )
والحتت اللي بتطولها ايديكي الطاهرة وايدين العيال دي بتغسليها كويس بالليفة والصابون السايل او صابون الريحة للحيطان شديدة الاتساخ
وبترجعي تجيبي مساحة او نفس المقشة وتلفي عليها قماشة مبلولة معصورة وتمسحي بيها اللي انتي عملتيه هتلاقي الحيطة بقت فل واكنك لسه دهناها

وما ننساش مفاتيح الكهربا ودي بتنضفيها بقماشة ناشفة لا هي مبلولة ولا حتى مندية لسلامتك وسلامة اسرتك
وكمان ما ننساش اللمبة تنضفيها او النجفة اللي عندك
ودي بتنضفيها والكهربا مفصووووووولة
وكمان ما تنضفيهاش وهي لسه مفصولة من دقايق بسيطة لا لازم تكون باردة مش سخنة
وكمان بعد ما تخلصي تنضيفها ما تنوريهاش على طول عشان ما تتحرقش

نيجي بقى لباب الاوضة
دا بنغسله بالليفة والصابون السايل
وبعدها بقماشة مبلولة بمية نضيفة وبتمسحي الباب
وبعدها بتبتدي تلمعيه

ما اصل التلميع غير التنضيف
وما ينفعش نلمع من غير ما ننضف
يعني مثلا اسمع من بعض الاخوات اللي تقول انا بالمع الموبليا وبرضو مش تنضف انا عاوزة المعها كويس
انا جبت بليدج وباجي استخدمه وبلاقي الخشب بتاعي بايظ وملزق و....و........ وتفضل تعد وتحصى مساوئ المنظف اللي بتستخدمه حتى لو جاز
لازم نحط كده قاعدة ونمشي عليها
اننا قبل ما نستخدم اي فشفش فشفاش اللي هي البخاخة لازم نستخدمها على نضافة
يعني قبل ما تيجي تلمعي موبليتك لازم الاول تنضفيها وتشيلي منها الاتربية لان ملمع +تراب وعفار=طيييين وتلييط وهتبقى الدنيا مليطة
وبدل ماهو نضفني شكرا هيبقى ليطني شكرا
طيب نقول بقى ننضف الموبليا ازاي وازاي اخليها تلمع
نجيب طبق محترم وفيه شوية ماية ونقطتين بريل او فيري وحبة صغيرين ديتول العادي او متعدد الاغراض اللي عندك لان الديتول منظف اكتر ماهو مطهر ودي معلومة حطيها تحت باطك وانتي ماشية في البيت
وتجيبي قماشة بيضة بفتة
ولازم يكون ادوات التنضيف نضيفة يعني مافيش داعي من حتت القماش اللي عاوزة تنطخ بالنار دي لا لازم يكون قماش التلميع ده قشطة ولوووووز
ولازم يكون معاكي فرشة سنان بتاعة التنضيف
عشان تنضفي الاماكن اللي زي دي
وانا موبليتي للاسف موديلها مترب يعني تحسي ان في الزخانيق دي تراب اسود متعفن بس هو الحمد لله زي الفل


وتفضلي تنضفي وتشيلي في الاتربة وتمسحي طبعا هتقوليلي دا دولابي فلة جربي ومشي القماشة المبلولة هتلاقيها بتطلع احلى شغل
وبعد ما بتنضفي بالقماشة المبلولة وياحبذا لو تكون جيل يعني مش قطن ولا فوطة عشان تكون سهلة معاكي في التنضيف باحسها بتنضف اكتر
لكن وقت ما هتنشفي لازم يكون القماشة بيضة قطن او فوطة ومافيش داعي من الموبرة
طبعا القماشة بتكون قديمة يعني فوطة قديمة طالع وابرها او فلنة سي اللافندي جوزك برضو قديمة ومنحول وبرها هتقوم بالواجب
ولو بتحبي تشتري قماش تلميع جاهز يبقى خير وبركة
نيجي بقى لتلميع الموبليا عشان تدي اللمعة المطلوبة
يا اما بليدج
يا اما جاز
يا اما زيت عطري ورد او روح الزهر او روح البرتقال في بخاخة وشوية ماية قليلين وتبوخي وتمسحي برضو بقماشة نضيفة خالص غير التانية وتلمعي بيها بقى موبليتك
والجاز برضو في بخاخة
وكلهم بيسلكوا نفس المسلك وبيلمعوا بشكل هااايل
مافيش داعي بقى تلميع بزيت طبيخ والكلام ده ابوس ايديكم ورجليكم عشان انا باضرس معلش



تحت السرير
طبعا لازم نشفط المراتب زي ما اتعلمنا من ماما مملكة ربنا يبارك فيها يااااااارب
وزمن المضارب راحت خلاص واللي عندها مضرب تنفيض تعمله ديكور في البيت عندها
وطبعا لازم من حين لاخر ننضف تحت السرير ونهوي تحته لو انتي بتخزني حاجة فيه
وكمان يتمسح ويتنشف كويس ومن الحاجات المهمة اوي اللي لازم تعمليها انك ترشي تحت السرير بعد تنضيفه اي مبيد حشري تجنبا للحشرات
والتخلص من اي اوراق او كراتين تحت السراير عشان الحاجات دي بتجيب صراصير


نيجي بقى للدولاب
اه دولابك
ما دا كمان بيتنضف ولازم يكون متنظم
طبعا من حين لاخر بنلمع الارفف والدولاب من جوا ونشوف المفارش لو مش نضيف ومتربة بنغسلها لو نضيفه وبنسيبها ودايما عنيكي الغالية هي مقياس لدرجة نضافة اي حتة في البيت
ونحاول الدولاب يكون متنظم والى حد ما متطبق بشكل كويس بلاش حكاية البؤجة دي
ودا مثال ضيق لدولابي وهدومي




نيجي بقى للتسريحة
اتكلمت عنها كتير في اجزاء كتيرة من موضوعي ومش لوحدي كل الجروب اتكلم عن تنظيمه وكمان بالصور
وبجد كل الاشكال كانت تحفة
ودا شكل جديد عملته للتسريحة بتاعتي غير الصور اللي رفعته قبل كده يعني حصري واصلي




ودي تسريحة ام الدودو خالتي






نتكلم بقى عن الادراج
لازم طبعا الدرج بتاعنا واي كان الدرج ده ومكانه لازم يكون متنظم ونضيف
مافيش داعي من الدرج العمومي قريب الحمام العمومي اللي بيجمع كل حاجة
يعني ربع جنيه مخروم تلاقي ريال سعودي تلاقي قلم رصاص مقصوف وقصير مش عارفة محتفظين بيه برضو تلاقي كعب نور او وصل غاز تلاقي كارت ام عايدة فردة شراب مش لاقيين صاحبة باقلنا كام سنة برضو تلاقوا ويا حبذا بقى لو قرص اسبرين ولا مسمار مصدي ولا مفك يعني على كل لون يا باتستا واكيد شوفنا المنظر العجيب ده كتير وممكن مش في درج بس ممكن تلاقوه في الفازة رمز الشياكة في البيت تلاقي فيها كل ما يسرك
لكل بتاعة بتاعتها (مش عافة بيقولوا ايه في الحظة دي )
بس لكل حاجة مكانها يعني العدة ليها مكانها هدومنا وشراباتنا نقسمها بلاش سوق التلات يتنقل جوا بيتنا وف ادراجنا كمان عيب
هي الست ايه غير نضافة ونظام وشوية ادراج فوق بعض
دا بقى اكتر درج عندي مليان حاجات وبحاول كتير انظمه ومش بيتنظم اكتر من كده
فهو يشمل لتوكي ودبابيس الشعر والمناديل المببلة والامشاط وسلكات الودان وبعض من الاكسسوارات الصغيرة


نيجي بقى لتنضيف الشباك لو شيش يا اما بتنضفيه وهو متركب يا اما بتفكيه وتنضفيه في الحمام وممكن تستعيني بصديق في فكه مش عيب برضو

درفة الفوط


السجادة لو شديدة الاتساخ يبقة تحطيها على رقبتك وتشدي ع الحمام وتغسليها وهانزل صور هنا في نفس المووضع عن تنضيف السجاد ف الحمام وع الناشف وبالصووووور

بخصوص سقف الدولاب بتاع اوضة النوم
طبعا ما ينفعش ننساه وهو سقط مني فعلا سهوا
وهو اننا بنشفطه بالمكنسه ونجيب قماشة مندية مرة واتنين وتلاتة لحد ما ننضفه كويس
وزي ما قالت على لسان ماما مملكة اننا ممكن نفرش فيه حاجة عشان يكون سهل في التنضيف في كل مرة
وكمان اللي بيرص حاجة فوق الدولاب وقت التنضيف بننزلها وبنقوم بتلميعها ونرجع نرصها تاني
   

حاجة كمان احب انبه عليها
وهي

خصوصية اوضة نومك


لازم اوضتك دي يكون ليها خصوصية
وتكون خاصة بيكي انتي وجوزك وبس
لا عيال يدخلوها
ولا حد غريب يدخلها
ولا تستقبلي فيها ضيوف نهائي
ودا قانون وتحطيه كده بشكل عام
انا عاملة شنكل لباب الاوضة من برة وترباس صغير من جوه عشان احباب الله وخسبي الله ما يدخلوهاش
وطبعا انا فاردة في تسريحتي عشان انا من ساعة العلقة اللي خدتها من عيالي لما فتحوا الدرج بتاع التسريحة وخدوا علبة الفازلين ودهنوا الارض ادام باب اوضتهم وانا اتزحلقت زيوووووووووووووووووو على ضهري من باب الاوضة لاخرها
والحمد لله حرمت حد فيهم يدخل اوضتي ودايما بارتبها واقفلها من برة
وساعات بانسى وباخد على قفايا بس معلش يموت المعلم ويتعلم

كمان حكاية قمصان النوم اللي بتتعلق ورا الباب وعلى شماعة الاوضة
معذرة يعني _مش سيتك لبستيه مرة يبقى يتحط في الغسيل مالوش لازمة يتعلق _نفسي افهم ايه المقصود بكده _
برضو زي برضو واحدة اما تنشر قميص النوم باين مش تتاويه زي الملابس الداخليه
وزيها برضو زي اللي بتنشر سوري الاندر وير بتاع جوزها في اوووووول حبل واتفرجوووووووووووووووووو
ليه بس التلوث البصري ده
هو خلاص عشان بوكسراتك زي صحابك يبقى ننفتح بالشكل ده !!!!!!!!!!
كمان حكاية تاكل جوا اوضة نومك
او تفضلي راكنة طول اليوم ع السرير والريموت في ايدك بحجة اصل التي في في الاوضة
لا السرير ده وقت النوم وبس
وطبعا مش هاتكلم عن تزيينها واضافة الرومانسية فيها لان دي تبع شخصية كل واحدة وتبع شخصية اللافندي اللي بتعييش وياه
يعني اللي بتحب جو الشموع والافلام الرعب وتبرأ في الضلمة جميل اوي
واللي تحب تحط ورود حمرا وترميها ع السرير جميل اوي
واللي تحب تعمل اشكال وقلوب هاااااايل
واللي تحب تخرع جوزها وتحطله جماجم وحاجات بتهاجم ممتاااااااز
كل واحدة وطريقتها واسلوبها وشخصيتها وما اقدرش افرض ثقافتي عليكم
لاني ضد العولمة

Posted in: غرف النوم