Twitter Delicious Facebook Digg Stumbleupon Favorites More

الاثنين، 30 مايو، 2011

ازاي نتعامل مع الزبالة في البيت والشارع

موضوع مهم جدا اننا نتكلم فيه ونعرفه ازاي نتعامل مع الزبالة وازاي نحترم آدمية الزبال لان اكيد يوم القيامة هنتحاسب عليه
لان الغالب مننا كمصريين بنعامل الزبال بشكل غير آدمي وبننسى انه بشر زينا بيقرف وبيتعب زينا
وكمان ازاي نعامل بعض بين الجيران وبعضهم اننا مانأذيش جيرانا يعني ما نرميش زبالة في الشارع زي ما قولت ان بعض الجيران بيمطوحوا الكيسة بتاعة الزبالة بكل جرأة دا الست من دول بيبقى ناقص تغني لشنطة الزبالة يا شمس يا شموسة
وطبعا النصح والارشاد بالادب مش بيجيب نتيجة
وطبعا شوفوا منظر الزبالة من فوق عاملة ازاي ومنظر الشارع بجد منظر غير حضاري وغير آدمي بالمرة وطبعا شكل الشنط من فوق اكنها صغيرة بس هي في الواقع شنط كبيرة محملة بما لا تشتهيه الانفس
كمان عاوزة انبه على نقطة دايما باقولها بلاش لما نيجي نرمي شنطة الزبالة في الباسكت الكبير التابع لسرفيس مصر يعني نيجي على نفسنا شوية ونرميه جوا الباسكت بلاش بره الباسكت ع الارض يعني الايد يعني مش هتتشل لو جينا على نفسنا ورميناها جوا الباسكت ولا هدومنا هتتبهدل لو قربنا من بعيد لبعيد وحطينا الشنطة في قلب الباسكت بلاش التصرفات دي المفروض اننا اتعلمنا وفهمنا وشوفنا شباب الثورة المحترم وهو خايف على بلده وبيحبها زي بيته وبعد ما الثورة خلصت قام ونضف الميدااااان بجد عيييييييب
دا منظر لسه طازة من تحت بيتي
 وطبعا الشباك اللي مش نضيف تعرفوا ان هي دي اللي بترمي شنط زبالة وبامبرز
والسؤال بقى بتاع الحلقة فين البامبرز اللي مرمي من غير حتى كييييييييس ؟؟؟؟!!!!!!!!....كبروا الصورة وجابوا على السؤاااااال لتربح الف جنيييه
 شنطة الزبالة اللي طالعة من عندنا من البيت شكلها ايه هل مغلقة باحكام ؟
 هل موضوعة في شنطة سوداء ؟
والا في شنطة بيضاء وكل محتويات الزبالة باينة للناس كلها وطبعا بيبقي شكلها مش ظريف وتتكسفي ان حد يعرف انها بتعتك وهل الشنطة ناشفة والا بتنقط ماية وطبعا ساعتها مش هتتكسفي تقولي انها بتاعتك ده انتي هتنكري اصلا انها بتعتك يعني بصراحة كل حاجة ليها اداب حتي رمي الزبالة يعني زي ما كلنااتفقنا علي انها متترماش من البلكونة ومنرميهاش في الشارع والا بجانب صندوق القمامة الكبيرة لازم نتفق علي ان الزبالة متبقاش فيها ماية ومفيش واحدة تقول ان تجميع الزبالة مع بعض بتعرق وبتجيب مايه لواحدها والله الكلام ده باسمعه وطبعا ده بيبقي من الاهمال يعني المفروض لو هترمي اي حاجة فيها مايه تتصفي كويس يعني تبقي مصفة جانبك علي الحوض وتصفي فيها ونقشر مثلا الكانتلوب في المصفاة ونسيبه يتصفي خالص وبعدين نرميه والزبالة تتشال يوميا من البيت

والسؤال ده للي عندهم اطفال لسه بيلبسوا بامبرز يا تري بترمي البامبرز في الباسكت من غير كيس؟
 المفروض طبعا يبقي لا البامبرز في كيس لواحده ويتقفل باحكام ويتحط في الباسكت يا جماعة لازم نعامل الزبال علي انه انسان زيه زينا واللي منقبلوش غلي نفسنا منقبلوش عليه ده غير كده لو زوجك فتح الباسكت يرمي حاجه هيكون الوضع ايه لما يشوف المنظر ده ويشم الريحة دي
ده غير الزجاج المتكسر والزيت والحقن بضم الحاء طيب المفروض نعمل فيهم ايه عندنا برطمنات مربي مثلا او عسل او اي حاجة من اللي بنشتريها في برطمانات وعلب محكمة برضة مبنرضاش نفرط فيهم وبنغسلهم ونعينهم لحد ما يملوا علينا المطبخ ونرميهم في الاخر واحنا بنفض فبدل ما نرميهم ايحاجة زجاج اتكسرت حطيها في برطمان واقفليه وارميه او علبة بغطا محكم والزيت يترمي في برطمان او زجاجة حاجة ساقعة والحقن ربنا يعافيكم برضه في برطمان صغير وارمي (ودا للناس اللي عندها برطمانات كتيرة وبترميها فاضية) وكل واحدة وامكانيتها
وطبعا في باسكت في كل اوضة وفي الحمام نغير كيس كل باسكت يوميا انا بحط اكياس ليهم لونها ابيض وبجمعهم يوميا في كيس اسود وارميهم وماما مملكة كانت اتكلمت في نقطة ان بلاش نستعمل اكياس مستعملة زي اكياس الفاكهة والخضار والسوبر ماركت وفعلا بعمل كده زي ما قالت وبدعلها لان فعلا انضف ومش هتلقيها مكلفة ولا حاجة انا بجيب كيلو اكياس سودا وكيلو ابيض متوسط علشان باسكت الاوض والحمام وجيباه ابيض علشان ينفعني في حاجات تانيه ونصف كيلو كياس صغيرة علشان البامبرز والباسكت الصغير اللي علي الحوض وبيفضلوا مدة كبيرة جدا وبرده كل واحدة وامكانيانتها
دي الاكياس اللي باشتريها
دي شنطة سودا واللي فوق شنط بيضا الكبيرة للباسكيتات بتاعة الاوض والصغيرة للباسكت الصغير بتاع الحوض وللبامبرز اما العلب فدي كانوا علب لملابس حلوين ومتان انا غلفتهم وجلدتهم وحطيت فيها الاكياس كل مقاس
 وبارص العلب هنا في السباتة
 هنا بقى عاوزين نتعلم حاجة جديدة
وسهلة لينا لما نيجي نشتغل في المطبخ ونطبخ بيكون منظر التربيزة كده!!!! وطبعا مش بتلاحقي ترمي ولا تقفي جنب البوتجاز ولا ولا ولا خمسين حاجة بتعمليها وانتي واقفة في المطبخ
 اول ما تدخلي المطبخ تجيبي طبق وتلبسيه كيسة كده  وتفضلي اي زبالة تقشير اي حاجة يبقى على طول ودا في متناول ايديكي عشان لو قولنا نحط الباسكت فوق بيكون زحمة وعالي وبيزهق لكن جربوا دي وهتحسوا بالفرق والنضافة والمحافظة على نضافة المطبخ
 دي بقى مجموعة الباسكيتات بتاعة البيت كله
الكبير ده بتاع المطبخ اللي لونه اصفر
والاخضر بتاع الحمام
والسمني او السيمون اللي جنبه بتاع غرفة الاطفال
اما اللي في ورود دا عمل فني بتاع غرفة النوم
اما الصغير خاالص دا جردل بتاع حوض المطبخ

0 التعليقات:

إرسال تعليق

 
Design by Free WordPress Themes | Bloggerized by Lasantha - sherif alnaggr | Blogger Templates | تعريب وتطوير : شريف النجار