صيف بوك......نضافة بوك.......وأجازة بوك

ضحكنا كتير
هزرنا كتير 
لعبنا كتير
وقد اتى وقت الجد
كل عام وانتم بخير 
قريبا وهيهل علينا فصل الصيف
يعني اجازة
يعني مصيف
يعني حر
م الاخر يعني صراصير ونمل
وعشان ما نجيش في الصيف ونشتكي م النمل والصراصير
يلا نعمل احتيطتنا ونحضر اسلاحتنا عشان ما يقربش لينا ولا نملة ولا صرصار
ونبقى قاعدين محصنين
وخصوصا اننا لما بيجي الصيف طبعا بنحب اننا نصيف 
ولما بتيجي الاجازة بنحب اننا نأجز
وعشان ننعم بأجازة جميلة صيفية مش عاوزين نهد حيلنا في تنفيض وهدة
وعاوزين ننظم وقتنا عشان ننفض البيت
ونجيب نوت بوك
ما احنا لازم نكون بئا نوت بوكيين وصيف بوكييين وفيس بوكيين برضو مش هيضر
كله تطور طبيعي للحاجة الساقعة




هتجيبي يا ستي نوت بوك

وتكون خاصة بالتنضيف واللي هتعملي
وتبتدي تقسمي شغلك على مدار كل اسبوع والساعتين اللي هتعملي فيهم التنفيض دا
وكل واحدة وراحتها اللي تحب تنفض بعد الفجر دي اقولها ممتازة
واللي تحب تنفض بالليل اقولها على راحة راحتك
المهم ماتجيش في ساعة تحضير غدا
او وقت دروس
او مذاكرة وتقولي هييييييييييييييييييييه
انا هنفض
اختاري الساعة المناسبة ليكي
وهنبتدي بالصعب
واصلا بالتقسيم والنظام مافيش حاجة صعبة
بس اقصد اقول هنبتدي بالشغلانة اللي بتاخد وقت كبير
زي تحت السراير 
الادلبة
المطبخ
وهكذا ............
ولازم تجيبي  في التنفيضة دي كل الاسلحة الهتاكة وتجمعيهم كلهم في طبق او باسكت واحد عشان وقت الشغل ماتفضليش تروحي وتيجي وتضيعي صحتك ووقتك
وتفضلي تنادي على عياااالك
يا اسمااااااااااااعيييييييييين فين الجااااااروف
يا فاااااااطنة فييييين البخاخة يا بببت اتبخيتي في شعرك انشاء الله
وتفضلي تصوتي 
وتكرهي البيت والدنيا في ام اليوم اللي قولتي فيه هانضف

كيروكس دا بتاع نمل ترشي بس ف المكان مش هتلاقي نمل طول الصيف باذن الله

 دا ملاثيون  دا عشان نمسح بيه الارض بيتباع عند عمو العطار والصيدليات

 دا ديتول غني عن التعريف

 بودرة للنمل مش هيضر برضو

ولازم يكون في كمامة وجوانتي

لزوم الشياكة

وعشان تبقي موزة زي الست دي

كلنا هذه المرأة

طبعا في ناس النمل بيوصل للملابس الداخلية القطنية عندها
فاحنا لااازم نمسك كل الادلبة بتاعة الهدوم تفضيها وتلمعي الارفف من جوا بماية وديتول
وتجيبي كيروكس وترشي وطبعا تكوني غاسلة المفارش وترجعي تفرشيها لو كل يوم تمسكي درفة او ضلفة يبئا حلو اوي ريحته مش بتدوم بتتطاير في اقل من دقيقة يعني مش هتلقط في اللبس ولا حاجة
وكل يوم تمسكي درفة ووقت ما تيجي تنضفي الدرفة اللي فيها الشماعات ماتنسيش تنضفي شماعاتك
اللي فيها استنلس ما تغسليهاش هتصدي دي تمسحيها بس بقماشة بمية بديتول
والبلاستيك اغلسيهم في طبق ماية كبير وشوفي لونهم هيكون ازاي ويكأنهم جديدة
شايفيين الدولاب من جوا عامل ازاي تحسي انه عاوز الحرق بعد ما خرجت منه الهدوم

وكمان ماتنسيش الابواب بتاعة الدولاب فوق وتحت وكله

انا كنت فكاهم عشان وقت ما اجي ارص اللبس ما افضلش افتح واقفل واتخبط فيهم

وكمان عشان انضف مكانهم من اي عفارة او ترابه

وبعد ما تخلصي الدولاب من جوا لمعيه من فوق ورشيه اي مبيد حصنيه ومن ورا هاتي ماسورة المكنسة ومديها ورا الدولاب واشفوطي العنكبوت والعفار وبعدها رشي بودرة صراصير او كيروكس
وكده احنا حكينا عن الادلبة بتاعة الهدوم بشكل عام


نيجي لتحت السراير
اي صرصار يدخل م الشباك او الباب 
الامر مش بيسلم وخصوصا لما بتكوني ساكنة في منطقة موبوءة بالحشرات
طبعا بيجري الصرصار لتحت السرير ودا بيكون مخبأه
واكيد بتشوفيه بيدخل تحت السرير لما بتكوني جيباله شبشب الحمام وطالعة تجري وراه
تحت السرير 
لازم نكون متفقين انه يكون خالي من الكراكيب ويكون فيه حاجاتك المهمة
هتطلعي كل حاجة تحته تلمعيها كويس وتبتدي تنضفي تحت السرير وتمسحي بالملاثيون وتفرشيه وترصي الحاجة تاني فيه

هنمسك كل الادراج بتاعة الاوض
درج درج 
قبل ما نرتب ننضف الدرج كويس ونمسح بقماشة بمية وديتول وننشف بفوطة ناشفة ونكون غاسلين المفرش 
وقبل ما نفرشه نرش تحت منه باي مبيد وبعدها رصي حاجاتك بنظااااام واي حاجة مالهاش لازمة وزحمالك الدنيا شيليها تحت السريربطريقة كويسة


كده انتي نضفتي عشان تعملي حصانة من حشرات الصيف
نيجي بئا للنضافة


هتنضفي ايه في الاوضة
لسة ليكي
الحيطان والباب والشباك والستارة
ولو في نجفة ومفاتيح الكهربا


وف الاخر قبل الفرش هتمسحي بملاثيون وترشي ورا كل اثاث الاوضة رش كيروكس وزي ما قولت ريحته بتتطاير وخفيف يعني مش بيسبب اختناق باذن الله
بس لازم طبعا تلبسي كمامة 
وربنا يحفظكم يااااااارب
استنوني كل يوم هنقول حاجة
دمتم في حفظ الله

Posted in: نضفني شكراا