2:35 م
هدى سمير
حبايب قلبي جروب نضفني شكرااااااااااا
وكل فتوكة متابعاني من بعيد لبعيد باحبكم ف الله
النهاردة هاتكلم على حاجة مهمة اوي بيعيشها اغلب الستات المتزوجات اذا كانوا لسه صغيرين او كبار
طبعا كتير من البنات عايشين مع حمواتهم ومنهم اللي عايش مع امهاتهم
وطبعا بيحصل تضارب في شغل البيت
وكل واحدة بترمي ع التانية حمولها وف الاخر البيت بيتظلم وبيكون خرابة
وسيبوكم م البيت اصلا العيشة نفسها بتكون خرابة لان عدم التعاون في عمل اي حاجة وتكون بحب بيسبب كره فظيع ونكد في البيت
بتكون الحماة متعكنن عليها او الام وكمان البنت برضو
وكل واحد بيشوف من وجهة نظره انه مظلوم وان هو المجني عليه
طيب الوقتي عشان نحل المشكلة والنزاع ده
هاوجه كلامي للاتنين الحماة ومراة الابن
واول واحدة هاتكلم معاها هي مراة الابن
يا ريت توسعوا صدركم معايا واعرفوا اني باخاطب ناس محترمة وملتزمة دينيا
وكمان ان اي كلام هاقوله باذن الله بيكون فيه توجيه وعمل خالص لوجه الله
مراة الابن:
لازم مراة الابن قبل ما تتجوز اصلا مامتها ست الكل تعلمها ازاي تتعامل مع حماتها وازاي تحترمها
طبعا السؤال بيقول امتى اعلم بنتي الكلام ده؟
طبعا انا مش هحدد عمر لان كل ام ادرى بعقل بنتها وقدر استوعابه للكلام
يعني ممكن قبل فترة الخطوبة او بعد الخطوبة على حسب الفترة اللي انتي حاسة ان البنوتة بيتقدملها عرسان وممكن تتخطب في اي وقت تبتدي بقى تعرفيها وتفهميها وتديها قصص وكده
انا مثلا امي علمتني ازاي احترم حماتي وانا عندي 15 سنة
من خلال تجاربها مع حماتها وانها كانت عايشة معاها واد ايه كانت بتحترمها
فامي علمتني من خلال حكيها لقصص واقعية وذكرياتها فاتعلمت منها اني احترم حماتي مهما ان كان
وبعدها بشهور كنت مخطوبة عى طول (بس دي مش طريقة يعني عشان العريس يتقدم انا بس بادي مثال ضيق الاقي كل ام ماسكة بنتها بتعملمها عشان العريس يجي )
لازم مراة الابن كمان انها واجب عليها انها تحبها وتحترمها
ولو ان نفسها مش جايباها تحبها يبقى ع الاقل تحترمها
وصدقيني لو انتي احترمتيها وعملتيها كويس دا بعد كده بيؤدي الى حب على مرور الايام
وانا لو قولتك عامليها احسن من مامتك طبعا هتزغوريلي
وانا باكد كلامي وباقولك اه
عامليها احسن من ماما
بين البنت وامها مافيش تكاليف وبيكون في دلال بينهم ولو قولتي كلمة كده ولا كده ماما ممكن تبلعها بس حماتك مش هتبلعها
لو روحتي ماما ومعزومة عندها طبعا واجب عليكي تقومي وتساعديها وتغسليلها المواعين وتنضفي وممكن تدلعي شويتين وتعملي نفسك فهمي وماتنضفيش حاجة ساعتها ماما مش هتزعل
بس حماتك هتزعل وعشان كده لازم تبقي متأهبة انك تقومي وتشتغلي وتساعدي وايدك بايد حماتك وتلمي ماطرح ماعيالك بهدلوا
ولو انتي تعبانة مش قادرة تقومي تشتغلي اساسا عندها يبقى كان من بابا اولى تعتذري عن العزومة عشان انتي تعبانة
ومافيش واحدة تيجي تقنعني انها بتحب جوزها ومش بتحب حماتها ابدااااااااااااااااااااااااااا نهااائي متحاوليش ومش هقتنع
دا دي يا جماعة اللي جابتلنا راااااااااجل ولو مش بتحبي راجلك يبقى اكيد في ما بينكم عشرة برضو تدفعك انك تحترمي تلك المرأة
من الحاجات اللي باشوفها في المنتدى هنا واللي بجد باضحك وبازعل لما باشوفها
ماهو هم يبكي وهم يضحك
تلاقي فتوكة ما تيجي وتقول: يا بنات تعالوا عرفوني اعمل ايه لامي ماما معزومة عندي واظبطلها ايه اصلها بتحب كذا وبتكره كذا وتبقى ياعيني لافة المنتدى كله عشان تاخد اكبر نصايح عشان تعمل عزومة لست الكل برضو انا احترمها في النقطة دي
تيجي بقى نفس الفتوكة اه والله زي ما باقولكم كده تيجي وتقول:
الحقووووووووووني الحقوووووووووني حماتي معزومة عندي بكرة وتفضل تولول في قلب المنتدى ويا اللي رايح ويا اللي جاي
وطبعا ماتلاقيش حد يقول كلمة كويسة في حق حماتها الست الغلبانة
لا طبعا كل فتوكة تدخل وتقول قلبي عندك يا ختي
ربنا يصبرك
واللي تدخل تعزيها
بجد حاجة مايعلم بيها الا ربنا
العدل ثم العدل يا جماعة
العدل في المعامة الله يخليكم كل ده احنا بنتحاسب عليييييييه
زي ماتحبي يجيب لامك يجيب لامه
وخصوصا في الزيارات لما تيجي تروحي والدته وهو معاكي وقفيه واتناقشي معاه هنجيب ايه واحنا رايحين
الحاجات البسيطة دي بتزودك في عين راجلك وبيزود الحب بينكم والالفة
طب لو مراة الابن عايشة مع حماتها في نفس الشقة او البيت
واجب عليكي الخدمة
وواجب على زوجك انه يربيكي في بادئ الامر مادام وافقتي على انك تعيشي معاه عند امه على انك تخدمي امه
ولو وقف معاكي ضد امه اذن هو ابن عاااااق
وكما قال الشاعر: اللي مالوش خير في امه مالوش خير في حد
واجب على مراة الابن:
*انها تزورها بلاش مقولة خالتنا بمبى: ابعد حبة تزداد محبة
ومقولة خالتنا زوبة: البعد عنهم غنيمة افضلي انتي ماشية ع النمط ده وباذن الله تعلمي عيالك بشكل غير مباشر كيفية قطع رحمه وبرضو بشكل تاني كيف تصبح عاق لامك وسقفة كبيرة
*واجب عليكي تعاملي حماتك كويس بلاش النظرات والنفخات والهمزات واللمزات (كل ده تتحسبي عليه)
*لازم تتكلمي عنها كويس ادام اي حد عشان اولا الغيبة ماتوقعيش فيها ثانيا ابنك ما يسمعكيش ويطلع يكرها ويبغضها زيك
*لازم مراة الابن تساعد جوزها انه يبر امه عشان تاخدي حسنات في دنيتك
*كمان تشجع الاولاد يحبوا جدتهم ويحبوا اخوات الزوج وحتى لو هم وحشين في التعامل معاكي يبقى تاخديهم على قدر عقولهم وخليكي انتي العاقلة
وبلاااااااش معاملة الند بالند
الحماة
الست الكبيرة العاقلةاللي لازم نحترمها
وانا احترمها اي ان كانت
انا عارفة ان كل ام بتحب ان يكون لابنها زوجة كويسة وهي تحبها فالو زوجة الابن كويسة هي هتشيلها في عنيها عشان كده ابتديت بالكلام عن مراة الابن
لكن الحماة اللي هي منها امي وخالتي وجدتي وقريبتي وجارتي وممكن تكون صحبتي اخجل اني اقدم لها نصيحة
لان هم منبع النصايح وهم اللي ربوا واخرجوا جيل محترم
هم اللي ربوا من غير لا يلجأوا لنت ولا تليفزيون
هما اللي عرفوا يطلعوا جيل صح
واحنا نقول جيل الوقتي مش زي جيل زمان
لا والله
امهات دلوقتي مش زي امهات زمان
تربية دلوقتي مش زي تربية زمان
الحماة اقولها:
*من حقك انك تلاقي المعاملة الطيبة من كل اللي حواليكي اللي من دمك واللي مش من دمك
*من حقك تروحي لابنك وتزوريه وتقعدي معاه وتقتحي تلاجته وتدخلي اوضة نومه ومافيش عليكي اي حرج
وفي نهاية كلامي
مافيش حماة هتعامل مراة ابنها وحش الا اذا كانت مراة الابن ابتدت بالاساءة
وياريت محدش يزعل من كلامي والف شكر على حسن متابعتكم
Posted in: نضفني شكراا
0 التعليقات:
إرسال تعليق