تنضيف البيت في الشتاء مع هدى سمير بالصور

السلام عليكم ورحمة الله وبركاته 

واحشني كتير كلكم وواحشني الكلام معاكم

الموضوع النهاردة عن تنضيف البيت ف الشتا 

واننا نتشجع عشان الكسل اللي عمله لينا الفصل الجميل دا :P
الشتا معروف انه بيسبب الكآبة لبعض الناس يعني اشوف ناس تشتكي من حالتها النفسية وخصوصا في الشتا
ودا بسبب قعدتنا ف البيت ومش بننزل كتير زي الصيف 

كمان ركودنا دا وكسلنا دا اكتر حاجة تعملنا اكتئاب يعني العيب مش ف فصل الشتا العيب فينا احنا وف طاقتنا السلبية اللي اعتادنا عليها في الفصل الجميل دا 

في ناس بتستغل الشتا دا اجمل استغلال منهم اللي بيحب يقضي هواياته زي الكروشيه والتريكو والمشغولات الاخرى ومنهم اللي بتحب تقضيه ف المطبخ وتتفنن في عمل اكلات للتدفئة ف الشتا ومنهم اللي بتفرح بالشتا عشان التجمع الاسري اللي بيحصل عند كل عاصفة او مطرة شديدة فعشان كده تلاقي الناس دي تحب الشتا جدا بلمته وبرصتنا جنب بعض كده 

استغفر الله العظيم يارب

بس احنا كستات نضاف ممكن نكتئب لمنظر البيت وقلة نضافته وكسلنا وبيكون نفسنا نتشجع بس بنقعد نكسل ف نفسنا لحد ما بنتنفخ :\

عشان ابدأ بتنضيف اي مكان ف البيت
لازم الاول يكون البيت ملموم يعني مترتب يكون ع الاقل كل حاجة ف مكانها اقوم كده قومة راجل محترم الم البيت كله ماخليش حاجة متكركبة ودا عشان وانا بانفض او بنضف ما تكونش اعصابي تعبانة وحواليا كل حاجة منكوشة 

الركن بتاع اعمالك اليدوية برضو رتبيه ماتسيبهوش كده متكربس على بعضه 

                                    

ف الشتا مش هقولك قومي الفحي سجادتك وشدي ع الحمام اغسليها ف البرد دا
ولا هقولك قومي فتحي شبابيك واغسليها جوا وبرة و رياح الرمال كل اسبوع والتاني
احنا هننفض في صمت
هنبدأ بالدواليب والادراج والتخلص من الكراكيب

طبيعي كل يوم بنغسل وبننشر وبنلم وبنطبق الغسيل (دا الطبيعي ) اي حد عنده خلل ف حاجة من دي يحاول يعدلها 

مع تطبيق الهدوم والرص هنحاول اننا كل يوم نرتبلنا رفين تلاتة والشاطرة تعمل الدولاب كله
الدولاب اللي دايما منكوش ومش بيترتب ابدا اعرف ان فيه حاجات انتي اصلا مش بتستخدميها وواخدة منك مكان ع الفاضي وكركبة وبس
فانتي لما تيجي ترتبي الدولاب هتحطي جنبك شنطتين كبار
شنطة هتطلعي فيها الحاجات اللي انتي استحالة هتستخدميها وتخرجيها لله 

وشنطة تانية تطلعي فيها اللبس اللي ممكن تستخدميه كمان كام سنة زي مثلا بنطلون كبير على ابنك بتقديرك الشخصي يلبسه كمان سنة او اتنين اشيله مع كام حاجة له كبيرة عليه او صغيرة عليه وهتعينها لابنك التاني اللي ممكن يلبسها كمان كام سنة وهكذا وتفضل الشنطة دي معاكي طول مانتي شغالة في الادلبة كلها عشان تعيني فيها الحجات اللي مالهاش لازمة حاليا عشان بعد كده تعنيها تحت السرير .

قبل ما هترصي الهدوم ع الرف لازم طبعا يتلمع كويس
مع الجو البرد بيكون نسبة الرطوبة عالية وخصوصا السواحلية وكمان مع قلة تهوية البيت يوميا بسبب الجو البرد فالرطوبة بتعمل عمايلها جوا الدواليب وممكن تعمل ريحة (كمكمة ) فلازم نعمل بخاخة ماية بخل شوية ديتول وترشي وتمسحي بقماشة ناشفة ...الخل ممتاز اوي ف امتصاص الرطوبة .

وتبتدي ترصي الهدوم بشكل منظم ومهندم
واللي بيدي للغسيل وهو مطبق شكل حلو ان كل التطبيقات تكون اد بعضها وكمان يكون اللبس معدول مش معمول ع القلبة وكمان ترتيب الالوان ف الرصة الواحدة بتدي تناغم حلو اوي زي كده مثلا 

بلاش تنيات التطبيق تبئا ف وشك زي التطبيق دا مثلا

وحاولي على اد ما تقدري مش لازم تيجي على نفسك مع التعود بيكون شكل التطبيق بتاعك جميل ومهندم 

كمان الادراج 

حكيت عن الادراج كتير اوي في مواضيع سابقة 

واتكلمت عن الدرج العمومي اللي شبه الحمام العمومي (اللي ماتعرفهوش تبئا تقولي وانا احكيلها عليه )
لازم من حين لاخر ترتبي ادراجك وتشيلي منها الكراكيب وتحطي كل حاجة ف مكانها
لما بتكوني لوحدك ف البيت بتكوني حريصة على انك تحطي كل حاجة ف مكانها لكن لما بيكون معاكي كائنات غريبة ف البيت وتقوليلها مثلا ايدكم معايا نرتب الاوضة دي تلاقيهم بيدفسوا كل حاجة مش ف مكانها المهم عندهم ان الظاهر اترتب وانهم سكتوكي بدوشتك وصريخك المزعج.

رتبي هدومك بشكل منسق اللي انتي بتعنيها ف الادراج
يعني اندرهاتك براهاتك باديهات الرفايع دي رصيها وتكون بالشكل دا 

الشكل دا رائع جدا وبيحافظ على ترتيب الدرج لما تيجي تعيني فيه او تاخدي منه حاجة عشان كل حاجة بتكون باينة ليكي وف متناول ايديكي 

درج الفوط بتاعة التواليت الخاصة بيكي
لازم تكون متنظمة بشكل شيك وكمان انا بحب اعطر الفوط دي
لما بكون بطبق الفوط بيكون ف ايدي روليت زيت عطري وااشد شدة كده ع الفوطة قبل ما اطبقها
بصراحة بتعطرلي الاوضة كلها مش الدرج بس او الكومود بس  .
ولما جوزي بيجي يفتح الدرج ويشم ريحة حلوة ويغفله حبه وهو بيشم انا ببئا متفشخرة اووووووووووووي 

طبقيها على شكل رول او مربع او مستطيل حسب زوئك والمساحة بتاعة درجك 

درج الاوراق (دا لو ليهم مكان اصلا مش كل ورقة ف ناحية )
اعملي درج للورق لو الادراج عندك قليلة ممكن كرتونة مستطيلة تعمليها للورق او شنطة لاب قديمة تعمليها برضو للورق
بس الاهم من مكان حفظ الورق
تنظيمك للورق نفسه
يعني اعملي دوسيه خاص بيكي فيه حاجة التخرج وشهادة ميلادك وصور للاوراق المهمة الخاصة بيكي
ودوسيه لسي اللافندي لورق الشغل بس
ودوسيه تاني خاص بورقه الشخصي
ودوسيه للاولاد شهادات ميلادهم

دوسيه للشهادات بتاعتهم والكروت اللي بيهادوكي بيها طوال السنين اللي فاتت اللي بيقعدوا كل سنة يتحفونا بيها
والصور فيها شرح كلامي

اللعب

رتبي لعب الاولاد ولمي كراكيبهم واللعب اللي هم كسروها وماعدوش بيلعبوا بيها وفيها خطر عليهم انها ممكن تعورهم او تعورك انتي شيليها ارميها 

اعمل كذا باسكت عشان تلمي فيها لعبهم ورفايعهم ...احباب الله (حسبي الله )
العرايس اللي بتقوم بدور الافلام المرعبة ف البيت ومع ذلك محتفظين بيها ف السبت ....شيليها ارميها بس خدي منها الفايبر المحشي فيها عشان الاعمال الفنية والابتكارات اللي احنا بنعملها وربنا يسامحنا عليها .

حاجة المذاكرة وكراكيب الاقلام والالوان 

انا عاملة سلة صغيرة للاقلام والالوان اي قلم الاقيه ما اسألش بتاع مين احطه ف السلة دي واي محاية واي براية ...وهم بعد كده بياخدوا حاجتهم منها بجد مريحني كتير جدا بدل ما اعين فادراج واقعد ادور زي الهبلة 

عاملة درج اسمه درج المصلحة العامة محدش يجي جنبه الا انا
حاطة فيه الكشاكيل الجديدة والاقلام والمحايات والبرايات والدباسة والجلاد والصمغ واللزق والمقص وحاطاهم ف مقالم محدش بيستعملها .
اي تجليد او حد عاوز حاجة من الادوات احط الدرج ع الارض زي ما اهو واشتغل منه والدنيا حواليا بتكون ملمومة ومافيش حاجة من الحاجات دي تضيع او يحصلها هدر بسبب فوضتهم شوية الكائنات الغريبة دي.
عاملة درج لكل واحد لكتبه وحاجة دروسهم ...يعني حاجاتهم خارج نطاق الشنطة

حاولي تحطي الحاجات دي ف برطمانات او مقالم ع المكتب بتدي شكل حلو ومنظم جدا للمكان

ست الحبايب يا حزينة عملالي سلة حطاها تحت المكتب بيعينوا فيها لبس المدرسة يجوا يقلعوا ويحطوا فيها لبس المدرسة اللي هيلبسوه تاني يوم هم مستسهلين الباسكت عن التعليق ورا الباب ...وورا الباب لبس الدروس بتاعهم .

درفة الشماعات بتاعة لبس خروجهم من تحت سيباه فاضي بعين فيه شنط المدرسة عشان بتزحم الاوضة وكركبة

وطبعا ما انساش باسكت الزبالة اهم باسكت ف اوضتهم بجد شابوووووووووه ليه باسكت المهام الصعبة
يعني عشان تكون اوضة الاولاد مرتبة نظمي حاجتهم ف سلال هتفرق معاكي كتير
وما الحياة الا سلة كبيرة

كده انا اتكلمت عن اللبس وترتيبه ف الادلبة والادراج وسائر الاماكن ف البيت
انتظروني الاسبوع القادم على ما تخلصوا ادلبتكم وادراجكم
وهاتكلم على حاجة جديدة تعملوها ف الشتا
كل برد وانتم طيبين احبكن ف الله

تابع القراءة »