تنضيف الغسيل في الغسالة الفوق اتوماتيك شرح مفصل بالصووووووووووووووور

النهاردة انا جاية اشرح لكل واحدة عندها غسالة فوق اتوماتيك ازاي تستخدمها وازاي بالغسالة دي تغسل انضف من الاتوماتيك وكمان احسن من العادية

الغسالة هي غسالة فريش وهي بتاعتي وعندي بقالها 6 سنين وتعتبر اول ما طلعت في السوق اشتريتها انا على طول

الغسالة بتاخد مسحوق عادي مش اتوماتيك وبتعصر وبتشطف كله مع بعضه مش زي ام روحين او حلتين لا هي زيها زي الاتوماتيك بس بدل ما تكون فتحتها في النص دي فتحتها من فوق

وبدل ما تاخد مسحوق اتوماتيك دي بتاخد مسحوق عادي وبتعامليها معاملة الغسالة العادية

الغسالة فيها مدخلين للماية عمو السباك بيركبهالك  ماية سخنة وباردة

وفي ناس بتوصل ماية باردة بس كل على راحتك انتي

دا غير اني باحط فيها كلور عادي

وبانقع الابيض وبازهر برضو فيها ومن غير تلطيش

وكل دا هاشرحه بالصور

دي صورة الغسالة

 

اول حاجة هاتكلم فيها هي غسيل الابيض

يعني غيارات سي اللافندي على غيارات العيال لو في شرابات بيضة 

ولازم عشان تغسلي الابيض اوعي اوعي تغسلي معاه لا فوط الا اذا كانت بيضة سرف ولا تغسلي معاها قطنيات فيها لون تاني حتى لو فاتحة عشان الابيض بتاعك يكون مزهزه

الابيض بتملي الغسالة ماية سخنة وبتحطي نص مكيال مسحوق من العادي اي حاجة واللي موجود 

وبتحطي معلقة ملح لمون ومعلقة بيكربونات وشوية كلور 

وبتبشري نص صابونة

بتجيبي اي نوع صابون يا اما صن لايت وكلنا عارفينها يا اما الصابون بتاع ستي وستك اللي هو ده

 بتبشريها في طبق

 ودي تعنيها لغسلة تانية فوط او اي حاجة

وبتسيبي الغسالة تدور وهي مفتوحة اوعي تقفليها لاحسن تصرف وتعصر وتشتغل مع نفسها اصلها هابلة الغسالة وتعملها

لا بتسبيها تدور كده عشان تدوب الصابونة كويس اوعي تحطي الابيض قبل ما البشر بتاع الصابون يدوب

لو الابيض بتاعك شديد الاتساخ بتسيبيه منقوع من بليل للصبح يعني ليلة كاملة 

ودا على برنامج النقع وبتقفلي الغسالة وانتي متطمنة طول ما انتي مشغلة برنامج النقع اللي بتجبي عليه المؤشر زي الصورة كده

طبعا لو عندك شراب ابيض مش نضيف زي شرابات المدرسة اللي مهما بتغسليه ولو بكلور مش بينضف 

وعاوزة تنضفيه بتعملي الاتي قبل ما تحطي الشرابات او حتى اندر وير ليك سوري يعني مش نضيف غصب عنك نتيجة لبريود اوي حاجة شبه كده

بتجيبي الصابونة وانتي واقفة ع الحوض جنب الغسالة بتقومي جايبة الشراب اللي بالمنظر ده وتفضلي تدعكي فيه بالصابونة وبعدين تحطيه في الغسالة ومش بتاخد في ايدك ثواني الحكاية دي ودا منظر الشراب المقرف بتاع الاء بعد ما بتيجي وتقلعه بيكون كده

طبعا احنا كده نقعنا وظبطنا الابيض بتاعنا والصبح دورنا الغسالة عليه على برنامج كبير عشان يتشطف كويس

نيجي بقى لمرحلة التزهير

بعد ما الابيض ما بيتشطف ويتعصر والغسالة بتخلص برنامجها الشيق

بتطلعي الغسيل م الغسالة وترجعي تمليها وتحطي فيها معلقة زهرة من بتاعة نيدو كده

 ولما الغسالة تتملى وتلفلها لفتين عشان تدوب الزهرة بتحطي غسيلك وتروحي مشغلة نص برنامج صغير بحيث يلف ويصرف ويعصر وبس

 ودا مكان ما تحطي المؤشر عليه وتقفلي غسالتك

 وبرضو التعطير بتعطري الغسيل بنفس طريقة التزهير كده شايفين ماسورة السخان الغاز النحاس بروبرق ازاي بانضفها بالليمون :)

طبعا الفوط باغسلها لوحدها وباحط بشر صابون عشان ينضفها كويس وباعطرهم باي معطر متوفر عندي

طبعا الاساور وياقات القميص برضو بتنضفيها بالصابون وبتمرشيها مرشا قبل ما بتحطيها في الغسالة

وبرضو اساور البيجامات بتاعة العيال ساعات لونها بيغمق برضو بالصابونة قبل ما تحطيها في الغسالة

ولازم اخلي الغسيل يدور كذا مرة في الغسالة قبل ما تصرف وتعصر 

يعني لما باحط الغسيل مش باقفل الباب باسيب الباب مفتوح ولما الدوران يقف بارجع اجيب البرنامج من الاول عشان  تفضل برضو تدور اكبر وقت والغسيل ينضف

وبكده باحس ان الغسالة دي بتنضف اكتر من الاتوماتيك

وكمان بتوفر عن الاتوماتيك

وبرضو ارخص من الاتوماتيك

Posted in: تنضيف وتنظيم المطبخ بالصور