7:23 ص
هدى سمير
وبعد غياب مش طويل اوي ارجع ونتعلم ازاي ننضف الانتريه
طبعا قبل اي كلام بتجيبي مقشتك او زعافتك وبتقومي بعمل كنس للحيطان والسقف عشان تشيلي عنكبوت او تراب لازق في الحيطان والقف
ودا بيكون براحة خالص عشان ماتنطوريس التراب في كل حتة وعلى مناخيرك
وحكاية نبتدي بتنضيف ايه الاول دا على حسب نظام الانتريه بتاع كل واحدة
بس انا باحبذ اننا نسيب تنضيف الانتريه اخر حاجة هو وكراسي السفرة لو في
طبعا بتشفطي السجادة بالمكنسة في بادئ الامر ولو هتغسليها بتحطيها في الحمام
ولو هتحكيها ع الناشف
بعد ما بتشفطيها بالمكنسة
بتجيبي طبق فيه شوية كلوركس الوان وماية وحبة خل لزوم الزهزه والتنضيف
وتبتدي انك تحكي السجادة حتة حتة
وبعدها بتجيبي طبق فيه شوية ماية وعليهم حبة معطر وتبلي القماشة وتعصريها وتبتدي تزيلي اثار الرغاوي البسيطة اللي عملها الكلوركس وكمان بتعطري السجادة
وبعدها بتشيليها تهويها ع المنشر او اي سور عشان لو فضلت مفروشة وهي مبلولة هتلقط كل العفار اللي هيخرج من الانتريه اثناء التنضيف وكمان من رجلك هتبوظ فانتي بتنضفيها وبتلميها بسرعة عشان تتهوى كويس
يعني نضفي الشباك والحيطان والبراويز وباب الشارع برا وجوا وبرا اهم من جوا
والجزامة
لو الجزامة قلاب
دي مش بيتفرش فيها مفارش عشان مش هتثبت بس تتنضف بالمكنسة بالاداة بتاعة المكنسة الطويلة بتقومي تشفطيها من جوها كلها وبقماشة مبلولة بشوية ديتول بمسحيها بس من جوا وبتسيبيها تتهوى حبة وبتكوني حاطة كل الاحذية يا اما في طبق كبير او سبت او كرتونة على ما الجزامة تتهوى وكمان ماتكونيش زاحمة الدنيا بالاحذية المهولة اللي هتطلع منها
اما لو الجزامة عادية
دي تفرشيها مفرش مشمع عشان تحمي الرف
وبرضو تتنضف بقى بالجاروف وبتتمسح برضو بقماشة معصورة كويس من الماية والديتول
طبعا النيش دا بننضفه كل فترة بعيدة يعني مش كل تنفيضة ودا على حسب نظرتك للنيش
لو شايفة انه مش نضيف بتنضفيه او محتاج اعادة ترتيب او تلميع حاجات معينة
كل واحدة على حسب نظرتها للنيش بتاعها وعنيكي هي المقياس
انا بالمع الحتت اللي باينة من الازاز بتاعة الرف بالمع درف الشيش من برة وجوا
وانا سمعت كلامكم وحطيت ورود مجففة وشوية كريستالات
وابحث عن الهدية داخل الكييييييس
الجدعة تقولي الورود فين
طبعا لو في سفرة او بوفيه تلميعهم مافيهوش مشاكل اتكلمنا عن تلميع وتنضيف الموبليا في اول صفحة
اخر حاجة في تنضيف الانتريه
من بعد ما نضفتي
الباب
الشباك
النجف
مفاتيح الكهربا
وتلميع وحدة التحكم بتاعة الكهربا من برة الباب بس
البراويز
كل الموبليا الخشب يعني
ومش هيكون فاضل غير تنضيف الارض وقماش الانتريه وقماش كراسي السفرة
هتجيبي المكنسة وتجري زي الرشيقة في قلب الريسبشن تشفطي الكنب والكراسي
وتكون المكنسة نضييفة والكيسة بتاعة المكنسة فااضية عشان تشفط كويس وهاقولكم شوية كده ازاي ننضف المكنسة بالصور
ونيجي بقى لتنضيف الكنب ع الناشف
اللي كنبها شمواه ما تتبعش طريقتنا لان كنبها له طريقة وشامبو خاص بتنضيف كنبها بتروح لماركت وتقوله عاوزا شامبو لتنضيف الشامواه ودا بينضف الكنب والسجاد والطريقة مكتوبة في ضهر كل ازازة شامبو
هتحضري الاتي
كلوركس الوان
اي ديتول عشان التعقيم
وانا باستخدم ده عشان ريحته كويسة مع الكنب
هتحطيهم على بعض في طبق وشوية ماية وتجيبي فرشاة لو قماش الكنب سميك لو قماش الكنب على حرير يبقى سفنجة وتكون نضيفة بلاش بتاعة الحوض الله يوستركم
وتبتدي تمسكي كل حتة في الكنب ع النااشف بلاش الفرشاة تكون مليانة اوي ماية وتغرقي الدنيا وتتعبي في التنشيف
ونفس الحكاية مع كراسي السفرة بس كراسي السفرة ما ننساش ننضفها من تحت ونشيل منها اثار العنكبوت والتراب بالمكنسة
وبعد ما هتحكي قماش الانتريه تجيبي ماية باي معطر دواني او كمفورت اي حاجة
وقماشة وتبتدي انك تشيلي اثار الصابون وتعطري كنبك
طب اللي عاوزة تقوم تنضف كنبها بس مافيش معطر عندها
هتجيبي اي ازازة برفان او كلونيا وترشي في ماية التشطيف بختين تلاتة وهتلاقي الماية والكنب اتعطروا وبقوا مية مية وجربوا واحكموا
هتاخدي القماشة المعصورة وتمسحي كل حتة في الكنب وبعدها هتجيبي فوطة كده محترمة ماتكونش بتاعة جسمنا تكون قديمة
وتبتدي تمسحي الكنب بالضغط ودا عشان يشرب الماية اللي موجودة في الكنب والكنب ينشف بسرعة باذن الله هو والكراسي السفرة
بعد كده بتنضفي ارضية الريسبشن وبتسيبي باب الشارع او الشباك مفتوح لتهوية الانتريه ولو في مروحة وتخرجي بعيد عن الانتريه عشان السقعة شغلي مروحتك
وبتكوني انتي لامة المفارش والاكياس بتاعة التكاوي عشان تغسليها وبتسيبي الانتريه عريان كده من غير مفارش عشان ياخد حقه في التهوية وبتفرشي اي حاجة ع الارض عشان العيال في السقعة
Posted in:
0 التعليقات:
إرسال تعليق