1:22 م
هدى سمير
منتجات الجميع على الويب سايت قريباً: إلى كل الستات اللي ضافوا منتجاتهم معنا على موقع ستات بيوت، بنعتذرعلى التأخير بعرض منتجاتكم!
مر الكتير وضل القليل إن شاء ...
مر الكتير وضل القليل إن شاء ...
السبت، 28 يناير 2012
الأربعاء، 25 يناير 2012
لشد البطن والصدر ولرشاقة جسمك بالصور والفيديو
لشد الصدر
وعشان مش كلنا عندنا البتاعة التقيلات دي عشان نلعب بيها
انا جبت ازازتين حاجة ساقعة الصغيرة دي
ال400 مل
ومليتهم طوب صغير من بتاع البنا او ممكن انتي تمليهم رمل او ماية اي حاجة والعبي بيهم
ولازم كل يوم نلعب رياضة ولو 20 دقيقة بس
حلوة بترفه عن نفسيتنا وبتشيل الاكتئاب وبتشد جسمنا وخصوصا اللي بيرضعوا
وهاسيبلكم شوية فيديوهات للرياضة مدتها اكتر من نص ساعة
الثلاثاء، 24 يناير 2012
تنضيف جهاز الكمبيوتر واللاب توب بالصور
تنضيف جهاز الكمبيووووتر
اول حاجة هنبتدي بتنضيفها وحدة التحكم السي بي يو CPU
كلنا بنفتح كيسة الكمبيوتر بنلاقيها بالشكل ده الشر برة وبعيد المروحة جوا تعمل عملين
او تسلك مسلكين
انها بتهوي ع البروسيسور ودا رقم واحد
رقم اتنين شفاط بيشفط التراب من البيت او من الاوضة اللي بنكون قاعدين فيها
وطبعا كل اما الجهاز يكون مليان مراوح كل ما بيطري اكتر ع الجهاز وكمان بينضف اكتر حواليكي وانتي قاعدة ع الجهاز
طيب الكيسة دي هنضفها بايه
اولا هتجيبي المكنسة تشبكي فيها الاداره دي
وتشفطي التراب من جوا ومن ع المروحة وكله وكله
وبعدين تجيبي البتاع اللي اسمه اكاي ده بيتباع في بورسعيد ب15 جنيه
غالي بس هيقعد معاكي فترة وبتنضفي بيه التليفونالت والرسيفر والتلفزيون حلو مش خسارة يعني في البيت ولا نضافة البيت وهو آمن عن اي منظف تاني
هتنضفي الباور اللي من ورا ده مرة اخويا حمبوكشة بيصلح جهاز لواحد صاحبه فلقى فيه فار صغير ميت
وصاحبه كان مستغرب ان جهازه بايظ :(
وتنضفي الهارد والسي دي روم CD ROOM
وتنضفي الرامة من جوا والسلوك وكله كله بالاكاي ده
ويكون معاكي قماشة نضيفة لزوم المسح
لو القماشة اتوسخت معلش حطيها على جنب وهاتي واحدة نضيفة
وبكده بيكون وحدة التحكم من جوا
نيجي بقى للشاشة
دي هتنضفيها يا اما بالاكاي يا ام بالجلانس
اولا :لازم تكون الشاشة مفصولة م الكهربا
ثانيا:لازم تكون باردة
ثالثاً :الرش ع الشاشة بملمع الزجاج مش هيكون ديركت يعني مبارشر عشان الشاشة ما يحصلهاش حاجة
هتجيبي ملمع الزجاج ده
وتبوخي بيها على حتة قماشة كده
وتمسحي ع الشاشة من برة
وتجيبي سلاكة ودان وترشي عليها برضو ملمع زجاز وتيجي ع الزخانيق بتاعة الشاشة وتنضفيها
وبفرشاة السنان بقى تبخيها برضو بختين وتنضفي الزخانيق بتاعة الشاشة من ورا اللي هي فتحات التهوية
نيجي بقى للطابعة
طبعا بنفس طريقة الشاشة انك تبخي في القماشة وتمسحي
والكيبورد بفرشاة السنان بعد ما بترشي على شعر الفرشاة بملمع الزجاج تنضفي الكيبور والماوس وش وقفا
وطبعا لازم نهتم بنضافة السلوك ونمسحها لان بيجي عليها عفار وغبار
هي والمشترك
وترصي عليه جهازك
واستمتعي بالمشاهدة
بالنسبة للاب توب مش هيختلف كتير في طريقة التنضيف
يعني الشاشة والكيبورد بتاعة اللاب وبس
الخميس، 19 يناير 2012
العناية الشخصية مع dodo fr
السلام عليكم يا قمراتى يا موزاتى يا فتوكاتى
قبل اى كلام
اطلعى على الشمال خدى التقييم فى ايدك وانتى نازله
علشان عملت الموضوع دلوقتى والجهاز هنج وتعبى كله راح ومقدرتش امسك نفسى من العياط
ثانيا هدخل فى الموضوع على طول
كان المفروض انزل جزء خاص بالشعر بس مش هينفع لازم ينزل فى قسم الشعر
هبدء بالوجه
عملت تونيك راااااااااااااائه رائع بجد بيبض ويصفى وينقى الوش ووكمان قابض للمسام
هنحتاج
قشر برتقال وقشر يوسفى +كوبايه رز منقوعه فى كوبايه ميه+كبسولتين فيتامين e
هنحط قشر البرتقال مع اليوسفى يغلوا مع كوبايه ميه ولازم نغطيهم
ولما يغلوا خالص هنطفى ونسيبهم متغطيين لحد ما يبردوا
هنصفى مغلى البرتقال مع ميه الرز ونخلطهم كويس مع معلقه ميه ورد ونقص طرف الكبسولات
ونفضيهم ونرج كويس ونحطفظهم فغى ازازاة ازاز وعلى التلاجه ونستعملهم زى التونيك
الصبح وبالليل
مع العلم انا بشرتى مختلطه بتميل للجفاف
وابقوا ادعولى
ثانيا
الجسم
طبعا مينفعش يمر علينا اسبوع الا ولازم نعمل اسكراب محترم لجسمنا
علشان كدة اخترعت اسكراب خطيييييييييييييييييير عبارة عن
كوبايه رز مطحون +كوبايه عدس اصفر مطحون +كوبايه سكر +كوبايه نشا+كوبايه بن
هنخلطهم كويس ونحفظهم فى علبه محكمه الغلق لحين الاستخدام
طب هنستخدمة ازاى هقولكم
هناخد منه مقدار معلقه مع معلقه كاكاو حبيبى دة مع رشة بيكربونات
ونعجن بيت زيتون ولبن
ندخل تحت الميه السخنه نبل جسمنا ونبدء ندعك حته حته
لو فيكى نفس بعد كدة هههههههههه ممكن تعملى ماسك لو مفيش
يبقى ليفه ناعمه بشاور خفيف ولطيف ودعك ظريف ونعيما
وطبعا مينفعش اسكراب بدون ترطيب ومينفعش اصلا شاور بدون ترطيب
ومع لوشن dodo مش هتقدر تغمض عنيك
اجمد لوشن جربته فى حياتى بجد
لمعان ونعومة وترطيب ملوش حل وريحه جنان ومفيش خطوط بيضا ولا خطوط دقيقه
يالا نشوف
لوشن الافوكادو
معلقتين فازلين بيور+معلقتين كريم عادى اى كريم ويا حبذا لو تلاقوا كريم بزيت الافوكادو واو
+معلقتين زيت افوكادو*غنى بالكولاجين* +معلقه زيت لوز حلو ومعلقة لوز مر ومعلقه زيت ورد
+معلقه جلسرين وانا عامله اسبراى جلسرين بليمون وميه ورد لايدى حاطاة فى المطبخ اخدت منه معلقه
هنسيح الفازلين على حمام بخار ونضيف الزيوت ونقلب نرفعه من على النار ونضيف الكريم
نصبه فى برطمان ازاز نضيف ومعقم ونسيبه يهدى بعد كدة ندخله التلاجه خمس دقايق
ونخرجه وبضهر المعلقه نضربه ضرب مبرح جدا
علشان ميفصلش وهيبقى بالشكل دة ومش بيلزق ابداااااااااااا
ودة نتيجته فى اللمعان بعد حوالى ساعتين كدة قولوا ما شاء الله
واللى هتجربه باذن الله مش هتبطله وجوزها هيدعيلى
نيجى بقى لمفاجاءة الموووووووووسم
الليزر المنزلى
سووووووووووويت الترمس الراااااااااااائعه
طبعا سمعنا عن فوايد الترمس فى تاخير نمو الشعر
فانا قعدت اوفكر واوفكر لحدما توصلت للاختراع دة
اولا هنجيب ترمس بلدى من حد موثوق والبلدى بيكون صغنن خالص
هناخد كبشه ننقعها فى ميه سخنه يومين
بعد كدة ناخد نص كوبايه على كوبايه سكر مع عصير ليمونه اوعى ترمى القشر حطيه
على باقى ميه منقوع الترمس
هنحط الخليط يغلى تقريبا 20 دقيقه
هنا بعد عشر دقايق لسه مغليتش
اول ما توصل للشكل دة تطفى فورا
وتصبيه فى صينيه او طبق بايركس مبلول ميه
وبالمعلقه تلمى السويت على بعضها
اوعى تسيبيها لما تهدى هتضطرى تمسكيها معلش وهى سخنه
وتمطيها وتلميها تانى مرة كدة وتقسميها على اكياس لو مش هتسخدميها فورا
وعلى التلاجه لحين الاستخدام وبتتسخن انك تحطى الكيس فى ميه سخنه وبس
نيجى للاستخدام
هنطهر المكان كويس بكحول مخفف بميه او مناديل كحول جاهزة
وننشف
السر بقى فى انك مش تتوجعى وتشيلى الشعر بسرعة وسهوله
هو انك تجيبى جنبك شمعه
وتمشى السوت عليها من فووووووق فهتروح تدفى
تقومى تفرديها على طول على المكان وتشدى مع وعكس اتجاة الشعر
وتكررى شمعه وتفردى وتشدى
متخافوش الجو برد ومش هتسيح ولو حسيتى انها هتسيح
مطيها واتنيها كذا مة هتجمد
بعد ما تخلصى فورا تروحى جايبه منقوع الترمس مع قشر الليمون
وبقطنه تبلى وتمسحى المكان اللى عملتيه كله او ببخاخ
وتسيببيه ينشف
وتكررى كدة كل ما تدخلى التواليت لمدة اسبوع
وتعالى قوليلى على اللمعان والبياض والنقاء
واقعدى بقى استنى الشعر بما يبقى يطلع
الاثنين، 16 يناير 2012
تنضيف وتنظيم الحمام بالصور
تنضيف وتنظيم الحمام بالصور
لازم كل ست تهتم بنضافة حمامهما بشكل يومي
وبشكل اسبوعي
وبشكل شهري
طبعا احنا عشان ننضف الحمام بشكل شهري
بنفضي الحمام كله من اي حاجة من ادوات تنضيف لادوات نضافة لفوط لاي حاجة
وبناخد الحمام من فوق لتحت
بندعكها دعكا مبرحا حتى يستغيث
وبنمسك كل الحيطان وبننضفها
وبنهتم جدا بالزخانيق والفروق اللي بين السيراميك انها تكون نضيفة وزي الفل ودا بيكون باستخدم المنظفات الخاصة بكده زي فلاش وهاربيك والمنظفات التابعة لبعض الشركات زي ماي واي
واي منظف عشان تشوفي نتيجته لازم بتسيبيه فترة لا تقل عن نص ساعة ولكأنك يعني نقعها زي ما بتنقعي الغسيل او حلة محروقة او غيره
والحمام بيكون بكل عام عبارة عن
حيطان
حوض
بانيو(مش الكل عنده بانيو)
وقاعدة او مرحاض _اعزنا واعزكم الله)
والحنفيات او ما يطلق عليه خلاطات
اولا: الحيطان
دي بتتنضف بفرشاة البلاط عادي بشوية صابون سايل وكلور وماية
طبعا الحيطان اللي مافيهاش سيراميك ومدهونة برضو لازم تتنضف عشان بتكون رطوبة بتكون لونها اسود فلازم تتنضف زيها زي السيراميك بالظبط
دي الحيطة اللي فيها سيراميك
ودي اللي مدهونة
ثانيا:الحوض
طبعا لازم بشكل يومي يتنضف وبرضو تنضيفه مش صعب شوية صابون سايل وماية وكلور وبالليفة او الاسكوتش وبتنضفيه
ممنوع استخدام السلك الالومنيا لانها بتجرح الحوض وبالتالي بيبان فيها الوسخ اكتر
ثالثا:البانيو
نفس الكلام في التنضيف
وما ننساش نضافة الستارة بتاعة البانيو
والناس اللي معندهاش ستارة البانيو انصحها بشراء ستارة للبانيو يكون لونها متنساق مع فرش الحمام اذا كان دواسة او ستارة للحمام لان بيدي الحمام شكل متميز وجميل
رابعا:الحنفيات
تنضيف حنفيات الحوض
او حنفية الدش
مش محتاجة اي افتكاسات او وصفات او خلطات بالفرشاة الصغيرة او الليفة بس من غير سلك مع الدعك وشوية صابون سايل بترجع زي الفل
واخيييييرا: القاعدة او المرحاض _اعزكم الله_
كلنا بيكون نفسنا نمسك القاعدة دي ننقعها في البانيو بالشكل ده في كلور خام عشان تنضف
طبعا في ناس مش نضاف مش بينضفوا القاعدة دي نهاائي وستات بيوت واحنا شوفنا كلامهم هنا في القسم
تحت مسمى انهم بيقرفوا يع
طب اللي بيقرف هيطيق يقعد يعمل بي بي في قاعدة زي كده ويكون السيفون بتاعها زفت كده ازااااي؟
سوري لو كنت قرفتكم
بس لازم نشوف الحلو والوحش عشان نحمد ربنا على نعمة النضافة
لازم نحاول بقدر الامكان اننا نهتم بنضافة القاعدة داخليا وخارجيا
واللي بتقرف او ما بتقرفش واااااحد
لازم نتبع الاتي
نلبس جوانتي
نشد السيفون ونكب ماية مرة واتنين وعشرة عشان ننضف القاعدة دي من جوا ومن برة
وكمان ننضف الغطا بتاع القاعدة ساعات ناس بتهمل نضافة الغطا دا وبتسيبه بالشهور وبتنضفه في الاعياد
كمان قاع القاعدة لازم ننضفه من حمض البوليك المترسب فيه
اللي بنقول عليه طول موجود وناشف وبنسيبه
لا دا ناتج عن قلة نضافته
وبيتشال
ازاي؟
هتنشفي القاعدة من جوة من اي ماية عن طريق قطع قماش مانتيش عاوزاها هتشربي القامشة دي المية وترميها بعد كده لو انتي قرفانة منها وبعدين هتجيبي فلاش او هاربيك زي ما عضوة قالت انه ممتاز وهتحطي فلاش دا من بالليل للصبح
هتصحي الصبح تشدي السيفون هتلاقي الطوب دا بقى رمل وهتنضفيها بعد كده عادي بالفرجون ودا اللي عندهم تكلسات في قاع المرحاض
وباذن الله هتلاقيها زي الفل من جوا كده
نيجي لمرحلة المحافظة على نضافة القاعدة
لازم كل يوم تتنضف من برة بالليف عادي
ومن جوا بالفرجون والصابون السايل ووشوية كلور عشان ما يحصلش ترسبات
ولازم بعد كل بي بي نعلم اهل البيت كبار وصغار شد السيفون حتى لو اضطريتي تعلقي يافطة بكده او تدخلي وراهم وتقولي مرة واتنين عشان يتعلموا ثقافة شد السيفون زي ما اتعلموا التشطيف بعد البي بي
تنظيم الحمام وترتيبه
اللي بيبين نضافة الحمام نظامه وترتيبه
وكمان لمساتك فيه بايديكي الطاهرة الغالية
ادوات النضافة الشخصية
ويجب ان يكون دائما الحمام منظم وادواته نضيفة
زي ادوات الحمام بتاعة نضافتنا الشخصية زي الليف وفرش الاسنان
وتلميع ازايز الشامبو والبلسم وعلب الكريم من الخارج كل اسبوع لان بيتكون عليها بعض الاتربه وكمان مع بخار الماية بتكون سطح العلب مش نضيفة
وكمان لازم نجمعها بشكل منظم ماتكونش بالمنظر ده متنطورة ع البانيو او في كل حتة حاجة
وعشان تاخدي شاور تفضلي تلفي وتدوري جوا الحمام وتلعبي لعبة دوخيني يا لمونة وعشان ترجعي كل حاجة مكانة تاخد وقت معاكي
لازم تكون ادوات النضافة الشخصية او الاستحمام تكون ملمومة في سبت واحد ع الاقل ودي ابسط حاجة
او ممكن تستخدمي الرشاقة الكورنر بلاستيك او استنلس
في ناس بتحط الفوط في الحمام ودا بيكون اساسي عندها
وناس بتاخد فوطتها وقت ما بتدخل تستحمى وخلاص
عادي كل واحد على حسب نظام حمامه
بس من المهم ان فوط تنشيفك الشخصية بعد كل تواليت تكون في الحمام بنظام وشياكة
وكمان رص الفوط برضو يكون منظم هتطبقيها عادي او رول
كل واحد ينام ع الجنب اللي يريحه
لازم الفوطة تستخدم بشكل يومي يعني مش اطلع فوطة واستخدمها اسبوع ولما تتبل اروح انشرها في المنشر غلط واكبر غلط
الفوطة اتبلت اه اهويها عشان احطها بسبت الغسيل واليوم التاني اطلع فوطة نضيفة
اومال ماما مشورانا بفوط كتيرة ليه (كانت هتدخل بيهم مسابقة )؟!
كمان مسألة الحمام صغير اوي كبير دي بقت واحدة
يعني حمامك صغير لازم يكون منظم ونضيف
واللي حمامها كبير نفس النظام
تنضيف الحمام مش بياخد وقت بس لازم نركز على كل حتة فيه
طبعا مسألة تعطير الحمام
زي ما تحبي عطريه بخريه بس ما اعتقدش بعد جو النضافة ده هيكون ريحته وحشة دا كفاية ريحة النضافة احلى من اي ريحة
كفاية انك تدخلي تاخدي شاور وترطبي جسمك وتخرجي تلاقي الحمام بعدها ريحته واو
كفاية انك تعملي بخاخة صغيرة فيها شوية ماية ورد على زيت ورد على مسك مبشور وبعد كل بي بي ترشي المنطقة بتاعتك وتنشفيها هتلاقي الحمام وانتي ريحتكم زي الفل لمجرد نضافتك انتي بس
طبعا فرش الحمام دا حرية شخصية
بس دا بيدي للحمام شكل جميل ومريح
بس لااااازم دايما يكون الحمااااام نااااااااشف نااااااشف ومتهوووووووي
وخصوصا في الشتا
وخصوصا اللي عندها اطفال بيكونوا لابسين شرابات في البيت ولما بيدخلوا الحمام بينسوا يلبسوا الشبشب وبيدخلوا جري ع الحمام
وما ننساش البوتي او التوتة ونضافتها من ضمن نضافة الحمام مادام جبنا سيرة الاطفال
كمان وضع باسكت في الحمام دي برضو على حسب حريتك ونظرتك لحمامك
دي كلها حمامات صغيرة شوفوا اد ايه منظمة وجميلة
وما ننساش نضافة المرايات وتلميعها بملمع الزجاج هي واللمبة ومفاتيح الكهربا بس لازم نفصل الكهربا
نفسي اعرف بيعملوا البي بي فين في الصورتين دوووووووووول
بتعملوها فييييييين يا ظلمه فكروني بفيلم اتش دبور
بيتصرفوا ورا باب الحمام؟
شايفين الحمام دا ياعيني صغير اووووووي
وفي كمان اصغر منه
يعني سوري تلاقي اللي يقعد ع القاعدة ما ينفعش الباب يتقفل عليه يا دوب يقعد وتلت تربعه بره الحمام يعني يكون قاعدفي الحمام وفي نفس الوقت مع الناس اللي قاعدين في الاوضة اللي في وش الحمام ويتفرج ع التي في عادي معاهم
سخان الماية
لازم يتنضف من فوق وتحت كويس جداااااا
باب الحمام
طبعا لازم باب الحمام يتنضف ويتغسل ويتنشف كويس
وكمان ما يتعلقش ورا باب الحمام هدوم كتيرة
وبلاش برضو قمصان النوم اللي بتتعلق ورا باب الحمام
مادام مش نضيف يتحط في سبت الغسيل عشان لو حد غريب دخل الحمام فجأة
او لو عندك عيال كبار برضو ما يصحش يشوفوا الحاجات دي
اوكرة الباب لازم تنضف كويس وتتعقم من حين لاخر
ولسهولة تعقيم الحمام بشكل مستمر
تعملي بخاخة فيها ماية وكلور وديتول بكميات متساوية وترشي وتمسحي بفوطة او مناديل الحمام الرول