تقليع الطفل البامبرز

النهاردة جايبة موضوع جديد

وهو اعلم طفلي ازاي يعمل بي بي ف التوتة ومايعملش بي بي على نفسه ولا ف البامبرز
بس الاول اعملي تقييم لموضوعي عشان الكل يستفيد باذن الله
بناااااااااااءا على طلبات البنات
وتساؤلات عديدة عن تجربتي في تعليم عيالي التوتة ولو انها تجربة مريرة ما احبش احكيها لان كذا قصة حصلت هبئا احكيلكم عليها بعدين في ساعة تجلي مش وقته خالص الوقتي
كتير مننا اتكلم عن تجربته في تعليم الطفل ازاي يتخلص من البامبرز ويبتدي يعمل بي بي ف الحمام طبيعي زي البني ادمين

اول مشكلة بيواجها الانسان ف حياته هي انه يتعود يعمل بي بي ف التوتة
وطبعا بتكون مشكلة عويصة ودي بتكون اول مشكلة بتقابله قبل مشكلة الثانوية العامة على طول
يعني الانسان بيعيش حياته يواجه في مشكلات ويطلع من حفرة يقع في دحضيرة
فالطفل بيحاول يحل ويطلع م المشكلة اللي وقع فيها دي
وبيقعد طفلك يفكر انا ايه بس اللي جابرني اني ابطل اعمل بي بي ف البامبرز واقعد ف البتاعة اللعينة دي اللي كان اسمها اصرية وبعدين سموها توتة
نقوله يا حبيبي احمد ربنا ان اسمها توتة دي المشكلة اتحلت شوية دي كانت على ايامنا كان اسمها اصرية ومع ذلك كنا بنقعد عليها بالرغم من اسمها العجيب دا
وكمان التوتة دي اتمدنت جدا يعني اسمها وكمان اشكالها دا امر مشجع جدا للطفل اني يسرع ويهرول ويجلس عليها ويعمل فيها بي بي

============================


نعلم طفلنا امتى يقعد ويعمل بي بي ف التوتة؟

يعني من سنتين ل 3 سنوات
ونكون في الصيف بلاش الشتا عشان ما يتعبش منك ويعيا كفى الله الشر
===========================
ابتدي اضرب امتى عشان يتعلم بئا عشان اتنفخت ؟
لا يا حبيبتي اياكي والضرب
الطفل مش هيتعلم بالضرب ابدا وممكن يحصل عنده انتكاسة
وبدل ما تعلميه انه يتحكم ف البي بي
لا انتي كده هتخلي عنده تبول لا ارادي زائد
=========================
اعمل ايه لما يجي ينام؟

قبل ما ينام دخليه يعمل حمام
وما تلبسهوش بامبرز
عشان انتي لو لبستيه بامبرز انتي هتكسلي عن الصحيان بدري عشان تقعديه ف التوتة وكمان هتكسلي تقلعيه وممكن يعدي نص اليوم بالبامبرز اللي نام بيه
=========================
اعمل ايه لما نخرج؟

لما تخرجي الكلام هنا هيكون في تفرقة عنصرية
يعني التعامل مع الولد غير التعامل مع البنت
بس لازم ويا الاتنين وقت الخروج يكونوا لابسين بامبرز اندر وير مش بلزء زي دا




دا بيكون سهل القلع
يعني الطفل وقت ما يقول بيبي تدخليه حمام على طول عادي لو انتي عند حد
ولو مالحقش نفسه اهو اسمك عاملة احتياطاتك الامنية
طيب لو انتي ف عربية او في مكان مافيهوش حمام
هتعملي وياه ايه
البنت ربنا يتولاها
طب والولد
عليكي وعلى الازازة
ايه الازازة دا
دا مشروع قومي محترم بتجيبي ازازة صغيرة فاضية وبتخلي ابنك الولد يعمل فيها وبعدين تمسحيله بمناديل مبللة
وتقفلي الازازة وابئا ارميها في اي باسكت

==============================
اعمل ايه عشان ما يحصلش انتكاسة؟


اياكي ترجعي وتلبسيه بامبرز في ظرف م الظروف لفترة كبيرة
اياكي والضرب والتريقة والاستهزاء لو عمل على روحه
دايما شجعيه وهاتيله اي حاجة حلوة
كل الحاجات دي تؤدي الى انتكاسة
============================
اجيب بوتي شكلها ايه؟
لازم يكون البوتي شكلها حلو ومافيش بوتي شكلها مش حلو كفاية الوانتها
بس لازم نراعي انها تكون عملية وماتكونش بتجرح وخصوصا اللي بتكون التوتة متجزأة وليها بتاعة بتتشال وبتتحط كده
تكون ملساء عشان ماتوجعهوش ويقوم بسرعة
تكون بسيطة زي دي وطبعا تكون مقاسة يعني ف اطفال رفيعين جدا وقت ما بتجيبي توتة مقاس كبير بيقع فيها بيتعبا جواها




==================================
اقعده امتى ع البوتي؟
اول ما يصحى م النوم تقعديه وتجيبي فطاره ولبنه وحاجته وتقعدي جنبه كده وتأكليه هتلاقي ربنا يسرها عليه على طوووول
وطبعا بعد اي وجبة دسمه قعديه
وقبل ما ينام
وسيبيه مبلول شوية عشان يحس بالقرف اللي هببه وياخد باله بعد كده



بالنسبة بئا للتحفيز
ما الموضوع دا نفسي اكتر من انه عملي
يعني لازم يكون عندك برطمان ملبس كده عشان كل ما يعمل بي بي اديله ملبسة
البرطمان ب9 جنيه تقريبا

وطبعا مش عيب ابدا تفضلي تحكيله قصص رعب عن الطفل اللي فضل يعمل بي بي على روحه لحد ماجاله تسلخات
او تحكيله على هيئة مسرحية بالعرايس
تجيبي لعبة بيحبها وتخليها تعمل بي بي ف التوتة
ما تستهونيش بالامور دي بتأثر ف الطفل جامد
يعني حاولي تعامليه على انه طفل يعني
ماتعاملهوش اكن عقله كبير زي زوجك مثلا
وانزلي بعقلك له وقتها
وقتها بس ما اشوفش واحدة هنا بئا متقمصة الشخصية وقايمة بدور طفلة والكلام دا
مش هاستحمل انا على فكرة

نيجي بئا لصلب الموضوع
وهو احافظ على نضافة البيت ازاي وانا باعلم ابني او بنتي تعمل بي بي ف التوتة


اولا:هتلمي سجاد البيت الاخص الاماكن اللي بتقعدوا فيه



ثانيا :هتعملي بخاخة فيها ديتول وشوية كلور وماية ونقطتين صابون سايل
لزوم التطهير والتعقيم لو حصل وعمل بي بي ع الارض تبوخي وتمسحي




وتكوني محضرة حتت قماش صغيرة

يعني لو عمل بي بي تقيلة تلميها بيها وف كيسة وترمي ف الباسكت
مانتي هتحطي كل التوقعات وتعملي كل الاحتياطات



ما الموضوع مش سهل دي حرب ويجب علينا اعداد جميع اسلحتنا للانتصار باذن الله


ثالثا :طبعا هتحتاجي انك تجيبي بناطيل كتير عشان كل ما يعمل على روحه تلبسيه بنطلون بس مش تغيرله تريننج كامل يادوب بنطلون وبس





رابعا : السرير
لازم السرير اللي بينام عليه يكون مفروش مشمع عشان المرتبة ما تشربش بي بي ويكون ريحتها اوفي
طيب السؤال اللي بيدور ف اذهانكم
اجيب مشمع شكله ايه؟
واد ايه؟
وافرشه ازاي؟
ودا مش هيزحلق الملاية والولا من ع السرير والاقي الولا والبي بي والملاية ع الارض جنب السرير؟
المشمع كتير واشكال وانواع
واي نوع هيؤدي للغرض المنشود
في المشمع الشفاف دا



وفي مشمع السفرة دا برضو كويس



دول هتلفي واحد منهم المرتبة كويس اوي وبعدين هتجيبي ملاية غير الملاية الرئيسية دي اسمها ملاية تحافظ ع المرتبة او تعمل ككافر للمرتبة
وتلفي بيها السرير كله داير ما يدور زي كده

وبعدها تفرشي ملايتك العادية كده السرير مش هيتزحلق وابنك مش هيتزحلق من ع السرير باذن الله ماتخافيش على سلامة وامن ابنك هو بين ادينا


في كافرات بتتباع جاهزة بتلبسيها للمرتبة زي كده

ودا اللي انا فكراه لحد الوقتي
وانا بقالي اكتر من اسبوع باعمل فالموضوع دا
لو عجبكم موضوعي قيموه عشان يفييد اكبر عدد
جزاكم الله كل خير
لا تنسوني بصالح دعواتكم

تابع القراءة »

اتعلموا ازاي تبروا امكم وايه الحاجات الغلط اللي بنعامل بيها امهاتنا

اه نتعلم الزاى نبر امهاتنا لازم نتعلمها غريبة صح لالالا مش غريبة خالص دا اللى المفروض نعمله احنا لو بصينا بعلاقتنا بامهاتنا هنلاقى فيه حد مشغل عليها نت كت كتير ودا معناته ايه بقى معناته ان النت بيهنج كتير يعنى مش هنعرف نحمل حاجة ولا ننزل حاجة ومش هنعرف نستفاد بالنت الزاى ماهو انا لو عملت لعلاقتى بامى كت مش معنى كت انى اقطع علاقتى بيها لا كت يعنى ممكن تبقى العلاقة موجودة بس متهتكه مش قوية وممكن ابقى عايشة معاها وبرضه علاقتى بيها متهتكة الزاى الكلام اه واحدة مثلا تفتكر انها ازكى من مامتها فاتقوم تعامل مامتها على انها غبية وتتعامل من منطق انها اعلى من امها فكريا دى بقى مصيبة  واحدة تانية تقلك دى ماما ست قديمة ودقة قديمة هعد انا بقى اسمعلها كل شوية هى اصلا تفكيرها قديم ودى برضه مصيبة واحدة تانية تقول اصل ماما تحب تمشى رأيها بس ومابتحبش تسمع لحد تانى ودى برضه مشكلة واحدة تانية تقلك اصل ماما مالهاش فى الموضوع ولا ليها فى الحاجات دى اخرها تعد تسمع مسلسل ولا فيلم وتحقر من امها برضه مشكلة وهالمه جرا من التفكير العقيم المريض بتاعنا بتاع اليومين دول
 طيب ايه الحل

الحل بقى اننا لازم ندور ونتعلم الزاى نبدأ تانى مع امهاتنا ونغير حياتنا ومعاملتنا معاهم مش هنخسر حاجة لما اسمع لماما واخد رأيها هى لما تلاقينى بسمعلها اكيد هتفرج وتتبسط وبعد ما تخلص كلام نقولها بصى بقى يستى الحباييب ايه رأيك فى الموضوع الفلانى ممكن نحله بالطريقة دى او نعمل فيه كذا من هنا تبدأ العلاقة تقوى من اول وجديد

 لازم برضه منحقرش من تفكير امهاتنا لا احنا دايما نحسسهم ان تفكيرهم من احلى التفكير واجمل التفكير انتى ممكن تعدى مع صاحبتك تكلموا بالساعتين وتاخدى رأي صاحبتك ومتقدريش تحقرى من شأن صاحبتك ولا تفكيرها يبقى ماما بقى تستاهل اكتر من صاحبتك ولا لا

 برضه لازم اننا نعامل دايما ماما من واقع انك هتبقى ام فى يوم من الايام واحنا عارفين كويس قاعدة كما تدين تدان وان عقوق الوالدين ربنا سبحانه وتعالى جعل عقوبته عقوبتين دنيوية واخروية يبقى لازم نحط قصاد عنينا واحنا بنتعامل مع امهاتنا انك فى يوم من الايام هتبقى ام 

برضه لازم دايما لو خرجت برة البيت اتصل بيها عاوزة حاجة اجيبهالك معايا وانا جاية حتى لو مش عاوزة هى هتفرح انك مهتمية بيها وانتى برة البيت 

 نكمل الموضوع فى مرة تانية ان شاء الله

تحيـــــــــــــــــــــــــــــاتى

تابع القراءة »

ونرجع تانى ونكمل موضوع الزاى نتعامل مع ابننا اللى فى الثانوى عشان احنا داخلين على امتحانات ثانوية

المرة اللى فاتت كنا اكلمنا على اربع نقط مهمه فى التعامل الولد فى المرحلة دى اكلمنا عن تحديد طريقة التعامل مع الولد والزاى يحدد هدفه واكلمنا عن الزاى نعلى من همة الولد 
النهارده هنكمل كلامنا 

هنقول سادسا 

 لازم تعملى جدول لابنك وتشرفى عليه بنفسك وهو يكون معاكى وانتى بتعملى الجدول بمعنى ايه اننا مثلا عنده درسين يوميا يبقى نحط معاد للدروس ومعاد للمذاكرة ومعاد للنوم وهكذا 

سابعــــــــا

 لازم نعمل نظام غذائى للولد فى المرحلة دى يعنى منسيبوش ياكل اى حاجة فى اى وقت وخلاص لا لان فى انواع اكل بتعمل عدم تركيز زى الاكل مثلا اللى فيه انواع دهون كتيرة كمان لازم يشرب لبن عشان اللبن بيعلى نسبة الذكاء والتركيز 

ثامنا

مهم جدا اننا برضه نعمل جدول للنوم يعنى اياكى اياكى ان الولد تيجى عليه الساعة 11 وهو صاحى لازم ينام بدرى ليه عشان يصحى بدرى يصحى يصلى الفجر ويذاكر من بعد الفجر لان المخ فى الفترة دى بيبقى فى كامل نشاطه بخلاف لو سهر نسبة التركيز بتقل كل مابيسهر اكتر يبقى زى ماقلنا فى الاول ينام بدرى ويصحى الفجر يصلى فى جماعة تحت فى المسجد ويطلع يذاكر كمان مينفعش بنام مثلا بعد المغرب لان الفترة دى بالذات لو الولد نام فيها هيقوم فى اول الليل وهيقوم تركيزه ضعيف وكمان هيقوم مقريف مش هيقدر يركز اوى فى المزاكرة

تاسعا بقى

 المفروض ان يوم الجمعة بالذات يكون فرى للولد يعنى مفيهوش دروس ولا فيه اى حاجة فيه بس ترفيه للولد ينسى اساسا انه فى ثانوى عام وباباه يعد وياه وتعدوا ويا بعض وتنزلوا 

عاشرا ودا بقى المهم ^-^ وكالعادة نكمل مرة تانية 

تحيــــــــــــــــــــــــــــاتى 

تابع القراءة »

فى الموضوع دا هنتكلم فى موضوع مهم جدا وهو الزاى تتعاملى مع ابنك اللى فى الثانوية العامة

مساء الخيرات عليكم جميعا احنا النهارده لازم نتكلم فى موضوع مهم جدا هو ايه بقى 
الزاى تتعاملى مع ابنك او بنتك اللى فى الثانوية العامة ولازم نعرف نفرق مابين التعامل مع البنت والتعامل مع الولد فى الحكاية دى بالذات واحنا الوقتى هنكلم عن الزاى نتعامل مع الولد 

اولا

لازم تحددى الطريقة اللى تتعاملى بيها مع ابنك الزاى يعنى تعرفى ابنك عصبى ولا هادى بيكلم كتير ولا ساكت انطوائى ولا بيحب النزول مع اصحابه وبيحب يبقى اجتماعى طبعا انتى لازم تبقى عارفاه دا ابنك برضه مش ابن الجيران

ثانيا 

 لازم تخلى ابنك يعمل هدف لحياته ميبقاش عايش كده وخلاص ولازم تنمى فيه الهدف دا من وهو صغير ولا  عشان يدخل كلية مثلا من كلية القمة ولا اى كلية وخلاص لا لازم يبقى عنده هدف اى كان الهدف دا وانتى تساعديه انه يوصل لهدفه ومتحقريش من هدفه مهما كان صغير او كبير انتى ممكن تنمى جوا ابنك الهدف دا وتخلى هدفه يعلى يوم عن يوم واياكى انك تحقرى اى حاجة هو بيعملها 

ثالثا 

 ان خبراء الطب النفسى بيقولو ان نتيجة لتغيرات هرمونية داخل جسم الشاب يعنى وهو داخل على مرحلة المراهقة فكره بيبدأ يتغير فى كل حاجة لازم انتى تلاحظى التغيرات اللى طرأت على تفكير ابنك من خلال ملاحظتك ليه عشان تعرفى تحطى ايدك على مواطن الضعف والقوة فيه ولازم برضه تبقى عارفة ان لكل فترة من العمر طريقة فى التعامل يعنى ايه الكلام دا يعنى ابنك وهو قبل مايدخل المدرسة حاجة وبعد ميدخل مرحلة الابتدائية حاجة تانية وفى الاعدادى حاجة تانية خالص وفى الثانوى زى مابنقول بيبقى دخل فى مرحلة المراهقة يبقى  شرط اننا منوحدش طريقة التعامل معاه من وهو صغير لحد مايكبر تمام كده 

رابعا بقى

  مانحاولش اننا نكسر مقدايفه دايما انت مش نافع احنا بنصرف عليك دم قلبنا احنا تعبانين عشان الى اخره من الكلام اللى لابيودى ولا بيجيب بالعكس بيخلى الولد مخنوق ونفسيا مش مظبط نحاول اننا نبعد عن قصة المصاريف وانت مش نافع والكلام الهايف دا 

خامسا

 خامسا دى الاهم بقى اننا هنكمل مرة تانية والموضوع لسة متقفلش وتابعوا وان شاء الله تستفيدوا عاوزين دعوة جامدة بقى 

تحيـــــــــــــــــــــــــــــــــاتى 

تابع القراءة »

والنهارده جايبالكم بقى حاجة اخر حلاوة طريقة عمل الكب كيك بس بطريقة جديدة وهيصوا ياله

تابع القراءة »

تنظيم سراير الاطفال وغرفهم ولعبهم بالصور

اوضة الاطفال عبارة عن :

دولاب

سراير

مكتب

لعب

وغيره

كل حاجة من دي ليها تكنيك معين لتنضيفها وتنظيمها

نيجي للسرير

لازم يكون تحت منه نضيف ومنظم ومرشوش اي مبيد حشري عشان يكون نضيف ومايدخلش ولا حشرة تحت منه

لان في الغالب تحت السرير في بعض من البيوت بيكون مخبأ ومنزل خاص للحشرات الزاحفة والطائرة

وكمان لعب الاطفال

لازم دايما تتفرز واللعب المتكسرة تترمى

واللي عندها اطفال بتحط اللعب في بوقها دايما تغسلها

هي اللعب بتتغسل!

اه بتتغسل وخصوصا العضضات والحاجات اللي بتزمر دي

جردل ماية وشوية صابون سايل انقعي وبعدها اشطفي تبئا فلة

وف مصفى وصفيها وسيبيهم ينشفوا

ولازم يكون في مكان للعب تتعان فيها اي حاجة سبت ادراج اي حاجة عشان الكركبة

واي طفل عليه البراءة وبيجي يلعب بيخلي اللعب كلها بالمنظر دا

ولا ميدان التحرير

واللي بيعطي للاوضة جمال اكتر هو فرش سريرها 

لازم الملاية تكون نضيفة ودايما تتغير 

بلاش حكاية الملاية تتغير مرة ف الاسبوع دي

يعني مرتين في الاسبوع وخصوصا في الصيف والحر

وطبعا من البديهي لازم الملاية تتنفض يوميا

ودي سنة عن الرسول صلى الله عليه وسلم

كان بينفض فراشة قبل ما ينام 

في اوض تكون مترتبة بس تحسيها مش مريحة للعين
اكن فيها حاجة مش متظبطة زي دي كده

 وحاطة حيوانات ع السرير هي ناقصة زحمة وكركبة

تابع القراءة »

خالتنا ام حسنات بتاعت الهند طبعا فاكرينها لما دخلت المدونة علينا بالفيل والبت حوسنية اخدته منها وربطته برة بعتللنا الفديو دا بقى عشان نشوف الزاى ننضف العنكبوت من البيت

تابع القراءة »

فيديو تنضيف خشب المطبخ

http://cleanup-house-pictures.blogspot.com ">-- powered by ehow

تابع القراءة »

ازاى تنضفى اثار الشاى والقهوة والمشاريب

http://cleanup-house-pictures.blogspot.com/ ">How to Clean Tea & Coffee Stains Off Kitchen Counters -- powered by ehow

تابع القراءة »

فوائد الوضوء والصلاة

بما اننا بقى اكلمنا كتير عن النضافة لما الواحد قرب يخس من كتر النضافة قررت بقى انزلكم موضوع دينى جديد ويارب يعجبكم ناقلاه انا على فكرة

تَزخر شعائرنا الإسلامية بكثيرٍ من الفوائد والمنافع، فلم يحثنا ديننا على أمرٍ الإ  وكان فيه الخير الكثير والوفير لنا، وعن فوائد الوضوء، روي عن الرسول صلى الله عليه وسلم أنه قال (من توضأ فأحسن الوضوء خرجت الخطايا من جسده حتى تخرج من تحت أظافره) [رواه مسلم]، فإن الوضوء هو عبادة يستعد بها المؤمن للوقوف بين يدي الله في الصلاة، تطهر الجسم من الخطايا، والسؤال: ماذا كشفت الأبحاث العلمية عن الفوائد الطبية للوضوء؟ أما المضمضة فتخلص الفم من الجراثيم الموجودة بشكل دائم في اللعاب وعلى الأسنان واللسان وفي جميع أجزاء الفم.

إليكم فوائد كبيرة للوضوء:
- تعمل مضمضة الفم على تنقية الفم من أمراض اللثة والتهاباتها ومن تسوس الأسنان.

- تساعد المضمضة في تقوية عضلات الفم والوجه وتقيه من التهابات المجاري التنفسية.

- يعمل غسل الأنف واستنشاق الماء على التخلص من الجراثيم الموجودة فيه حتى إن الذي يحافظ على الوضوء بشكلٍ جيدٍ يكون أنفه خالياً تماماً من الجراثيم، وهذا يقي الأنف من الأمراض ومنع الجراثيم من الانتقال إلى الجهاز التنفسي، أما بالنسبة لغسل الوجه فيعطي لجلد الوجه نضارةً وحيويةً ويخلصه من الجراثيم والغبار.

- يخلص غسل الوجه جيداً العين من الغبار والجراثيم، ويحميها من الالتهابات المختلفة، كما أن غسل الوجه واليدين يزيل بقايا العرق من على سطح الجلد ويفتح مسامات الجلد ليستطيع التنفس بشكل جيد، بالإضافة إلى إزالة الشحوم والدهون المتراكمة على جلد الوجه واليدين بسبب إفرازات الجلد، وهذا ينعكس إيجابياً على الحالة الصحية للجسم.

- يسهم غسل القدمين مع تدليكهما جيداً على وقاية الجلد في هذه المنطقة من الإصابة بفطور القدمين والعديد من أمراض الجلد في هذا المكان، كما أن غسل الوجه واليدين والقدمين وتدليك هذه الأجزاء يعتبر بمثابة تنشيط لجريان الدم في الأوعية التي تحت الجلد، وهذا ينعكس على الحالة النفسية للمؤمن فيزداد اطمئناناً وسكينة، ويتخلص بذلك من كثير من تراكم الانفعالات النفسية السيئة.

ومن الحقائق الطبية أن الدورة الدموية في أطراف الجسم عند اليدين والرجلين هي أقل منها في بقية أعضاء الجسم وذلك بسبب بعد هذه الأطراف عن مركز ضخ الدم وهو القلب وقد ثبت أن غسل هذه الأطراف وتدليكهما جيداً بانتظام يقوي الدورة الدموية ويزيد من نشاط ومناعة الجسم، وفي بحثٍ حديثٍ تبين التأثير الجيد للماء على الإنسان أثناء الوضوء في إزالة التوتر والقلق، لذلك يشعر المؤمن أثناء وضوئه بالطمأنينة، وهذا من أسرار الوضوء.

تأملي معي هذا الهدي النبوي الكريم من خلال قوله عليه الصلاة والسلام: (إن أمتي يدعون يوم القيامة غراً محجَّلين من آثار الوضوء فمن استطاع منكم أن يطيل غرته فليفعل) [رواه البخاري ومسلم]، ففي هذا الحديث العظيم تأكيدٌ من النبي الكريم صلى الله عليه وسلم على غسل أكبر جزء ممكن من الوجه واليدين والقدمين، لأن الذي يسبغ الوضوء ويحافظ عليه سوف تبدو آثار طهارته يوم القيامة، فما أجمل المؤمن أن يكون طاهراً في الدنيا والآخرة.

المصدر( موسوعة الإعجاز العلمي في القرآن الكريم)

تابع القراءة »

ازاي ننظم مصروف البيت بالصور

اول مرة اكتب موضوع عن الميزانية



النهاردة موضوعي مختلف
وعشان تبئي صحبتي وكفاءة
ركزي معايا

عشان الموضوع دا حصري واصلي
ولاول مرة ع النت

الموضوع بيقول ايه
طبعا كتير ممنا نزل ميزانيات
ايشي ب500 وانتي طالعة
وطبعا بتنول اعجاب بنات وبتنرفز بنات
ومش دايما بتعجب الكل
اكيد كل شيخ وله طريقة
انا بئا مش هاحدد ارقام انتي ومصروفك وظبطيها مع نفسك
اصلي عمري ما هاقولك انتي بتحتاجي ايه او بتشتري ايه
الهدف من موضوعي هو النظاااااااااام
انك تتعلمي تنظمي فلوسك وطلبات بيتك
دا اول طريق للتوفير وهو :النظااااااام.......اااااااااام
مش عشان توفري تتبعي نظام رز وفول حيراتي ورز وعدس ورز وبطاطس ورز وفول مدشوش ورز بطماطم وتبئي انتي كده الموفر المدبر ف البيت
دا ايه اللكمة دي


وكمان مش عشان اوفر اكول اكل بايت يبئا دا التوفير
ودا رأيي الشخصي مع احترام لجميع الاراء
اصل احنا سرو بلدنا في بورسعيد
اننا ما بناكولش اكل بااااااااايت خاااااااااالص
لازم كل اكلنا يكون فريش وصحي ومفيد وطااااااازة
فالطريقة اللي هاقولها دي فادت ناس كتيرة عملتها في الواقع يعني ناس اعرفهم علمتهالهم وماشيين عليها ومابهورين بيها
وباذن الله هتفيدكم
نيجي بئا للطريقة



طبعا انتي بتقبضي المرتب
اي كان رقمه
بتاخديه وبتطلعي منه

• صدقة (دي مهمة جدا بتطلعيها لاي حد محتاج وخصوصا لو حد تعرفيه وقريبك ماما اختك اللي بتتعلم حماتك اي حد واي مبلغ ولو بسيط)عارفة ان اختي هتقرا وهتضربني انا مش باتكلم عني انا باقول بشكل عاااام

• غاز وكهربا وماية ونت

• دروس وابونيه وكتاب لتحفيظ القرآن (لو عندك عيال في مدرسة او حضانة )

• جمعية

• طلبات البيت طوال الشهر وليكن 400 جنيه . دا مثال وليكن

• بامبرز

• ومصروف يومي ودا بيكون مبلغ كبير يعني مثلا 500 جنيه وبتقسميه ودا هاشرحه بنقسمه ازاي

هتجيبي نوت بوكي
ودي اساسي اوعي تمشي من غيرها تكون ايديكي ورجليكي
لازم تكوني شخصية نوت بوكية
زي ما بنشوف ناس كتير بقت شخصية فيس بوكيه




بتكتبي فيها كل طلبات البيت من خزين لمنظفات للحوم لغيره
وكمان تكتبي فيها الحاجات الشهرية بتاعتك ايجار تليفونات غاز كهربا نت وبتحطي رقم ادام كل حاجة عشان تعرفي في الاخر هتجمل كام جنيه




هتجيبي بئا اظرف صغيرة كده


دي عشان هنحط فيها مصروف يومي لكل يوم على مدار 30 يوم في الشهر
وكمان هتحطي فيهم باقي المستلزمات بتاعة كل شهر يعني هتحتاجي اكتر من 30 ظرف


هتحاول تعملي مصروف يوم بيومه وتحطيه في ظرف عندك من 20 جنيه ل30 عاوزة تزودي اكتر زودي بتحطيه في الظرف وتقفلي عليه


طبعا بتطلعي الظرف كل يوم وبتجيبي بيه حاجتك بتاعة اليوم
يعني فطار عشا ممكن غدا
ممكن اليوم دا ما تجبيش غدا ويكون عندك غدا ف الفريزر او حاجات م الخزين وممكن توفري المبلغ كله انتي وشطارتك
اللي توفريه في اليوم المبلغ كله نصه حتى لو جنيه تاخديه تعنيه على جنب حوشيه ما تصرفيهوش في اليوم اللي بعده اوعي دا شقاكي يا بنتي عنيه على جنب

وكده انتي معاكي 30 ظرف فيه مصروف يومي انتي وضميرك حدديه على حسب مرتبك وعلى حسب عدد افراد اسرتك الجميلة
بتحطيهم في اي علبة
انا حطاهم في علبة ديرو بتاعة الصابون



نيجي بئا لباقي مستلزمات البيت انظمها ازاي

برضو هنحطها في الاظرف دي
هتعملي ظرف (نت وكهربا وغاز وماية )
وظرف تاني (للدراسة يعني دروس ابونيه دار تحفيظ كده يعني )
وظرف عشان الجمعية
وتكتبي على كل ظرف دا خاص بايه



طبعا خطي بالقلم غير خطي بالكيبورد بيختلف حاجة بسيطة


وبيكون عندك علبتين كده وبتعينهم فوق جوا الدولاب


دي مناخير ادم حاشر نفسه ف كل حاجة


في ناس ممكن تقول مش لاقيه الاظرفة دي والدنيا تقف
انا برضو مكنتش لاقياه في المكتبات تحت البيت
وكنت باستخدم الاظرفة بتاعة البريد دي



كنت احط فيها الفلوس وارجع اطبقها كده بعد ما احط فيها الفلوس



يارب اكون قدرت اوصلكم اللي عاوزة اقوله
ويارب الموضوع يفيدكم

مع السلام عليكم


اختكم
هدى سمير

ملحوظة هاااااااااااااااامة :

الاظرف بتجيبي ب5 جنيه باكيت فيه كتير
وكل يوم تطلعي الفلوس وتعيني الظرف للشهر الجاي وبيفضل معاكي سنين


يعني مش كل شهر بتشتري اظرف 

تابع القراءة »