تنضيف الرشاقة والحوض وسخان الغااااااااااز بالصووووووووووور

الرشاااقة او المطبقية
او البتاعة اللي بنحط فيها الكوبيات والاطباق والصيني جوا في المطبخ
ازاي ننضفها وطبعا لازم ننضف اللي فيها ونخليها اكنها جديدة
ودا كنت اتكلمت عنه كتير اوي في مواضيعي القديمة
وهي اننا بنجيب طبق كبير ونحطه في الحمام واللي عندها بانيو خير وبركة بنملاه ماية دافية ونحط كلور بمقدار مج كده وشوية صابون سايل عشان الماية ترغي والقاعدة تحلو
وتجيبي كل الرشاقة وتنزليها كوبيات اطباق معالق اطباق صاج حل صاج مصافي بلاستيك شفشق الخلاط
اي حاجة حاسة ان لونها اتغير او زخانقها مش ولا بد خديها وحطيها في الطبق ده
بس احنا هنبتدي بالرشاقة الاول وبعدين اخلصي منها ولو عندك حاجات تانية عاوزة تتنقع اشطة اوي
طبعا ممنساش الصواني اللي هي البلاستيك او الملامين مش الاستنلس عشان ما تنطفاش وتطوس
الرشاقة عندي مدهونة ابيض بس للاسف صدت من كتر التنضيف وقشرت وبقى شكلها وحش اوي كده


جبت انا فرشاة دهين وكوز بوهية ب9 جنيه (بوهية زيت ) اصغر مقاس اهو

ودهنت الرشاقة  وسبتها تنشف وعلقتها ورصيت فيها الصيني بتاع المطبخ
ودي شكلها بعد الدهان برضو الدهان ده نضافة


طبعا كان لازم اخد معايا الحوض بالمرة والسخان والهواية بتاعة السخان
اللي بيغفلها كثير من الناس في تنضيفها وتلميعها
هي المونيا ومش معنى كده اننا نتجاهلها لا نضفيها واغسليها بسلك المونيا وصابون وهتبقى مرااااااية


وطبعا نضفت حتة السيراميك اليتيمة اللي عندي في المطبخ فوق الحوض
وبعدها مسكت السخان بتاع الغاز فوق وتحت وكله حتى ماسورة السخان النحاس قولت لازم المعها ولمعتها بنص لمونة بس ومسحتها بقت كده من غير لا سلك ولا صابون ولا حاجة





بعدها مسكت الحوض الاستنلس بفرشاة البلاط والصابون السايل وشوية كلور ودعكته فوق وتحت وماننساش الحوض من تحت يا جماعة لازم يتغسل كويس ويتنشف كويس اوي عشان ما يجيش عليه طبقات صدى

الحوض بقى من فوق لازم دايما يكون نضيف والقماشة بتاعة التلميع لازم تكون نضيفة لاش الحاجات الوحشة اللي بنشوفها وبنسمع عنها دي
يعني القماشة لا تكون ريحتها وحشة ولا مكمكمة ولا اكنها فار ميت في البيت
لازم تكون قماشة نضيفة وبعد استخدامك ليها تهويها
انا مش هاقولك روحي اشتري ولو انها اصلا رخيصة الحتت بتاعة الحوض بس المهم انها تكون نضيفة ومتهوية على طوووول
والقماشة اللي تحسي انها قدمت او او او ارميها يا ستي وهاتي واحدة تانية بلاش الاقتصاد للدرجة المريب فيها دي


والبوتجاز بكرة عشان انا تعبت وهاقوم
مع السلااااااامة

تابع القراءة »

لف مواسير الغاز بالصوووووووووور

تنضيف مواسير الغاز وطريقة لفها بالورق الحراري
طبعا اغلبنا قرا موضوع الفتوكة اللي كانت بتتكلم على موضوع لف مواسير الغاز وانها خطر ودا اللي سمعته من الراجل بتاع الغاز
لما جه وبص للمواسير بتاعة الغاز وقام شهق
وقالها دي خطر والكلام والتهويل اللي قاله ده
اللي يخلي اي واحدة فينا تسمعه طبعا تقلق لان اي كلام خطر في الغاز بنحط جنبه علامة الجمجمة في دماغنا
بس انا سالت سي صابر افندي لانها شغال في الغاز وكان ماسك قسم الدهانات بتاعة المواسير بتاعة الغاز قبل ما نتجوز
وسالته عن مدى خطورة لف المواسير وحكيتله عن الموضوع بتاع الفتوكة (لها مني كل الاحترام )
فضل يضحك
وقالي لا طبعا كلام غلط
اولا المواسير بتاعة الغاز عمرها ما تصدي هي مواسير ماية !
وقال انها بتدهن بطبقة عازلة وبتمحيها من الصدى من اي عوامل خارجية حتى لو كانت ماية مجاري (سوري في اللفظ)
وقال ان لفها بورق حراري وتغييرها بشكل منتظم دا يحميها من الزيت وطبعا عشان نطلع الزيت المتراكم هنستخدم مواد كاوية وهنا يجي الخطر بقى
لكن لفها دا الشئ الصح والاهتمام بنضافتها دا الاصح
واي كلام تاني فاضي بيكون غير معقول
وبرر كلام عمو بتاع الغاز ده بانه كان بيجر معاها كلام مش اكتر  او كان نفسه يحكي ومش لاقي حكاية يحكيها

نيجي بقى لكلام البنات اللي بتقول اصل المواسير بتلزق وبيصعب اننا نشيلها تاني
هي فعلا تلزق في حالة لو سبتيها بالشهور عمال يتكوم عليها زيت وتراب فطبيعي لازم تتلزق _يعني لازم نهتم بتغيير الورق بشكل مستمر مع كل تنفيضة المطبخ

نيجي بقى للشرح بتاع لف المواسير
انا باشيل الورق ويادوب بامسح بس ع الماسورة مش بحتاج اني اغسلها بالليفة والصابون لاني الحمد لله بداوم على نضافتها وتغيير الورق بتاعها

هتحضري الورق الحراري وتقصيه مستطيلات طويلة بالشكل ده


وهتاخدي مستطيلة مستطيلة وتكون ايديكي مبلولة كده


وتطلعي ع الكرسي وتلفي الماسورة بالورق الحراري وتقومي تضغطي عليها بايديكي الطاتهرة المبلولة كده


هتلاقي الورق شبك في الماسورة من بره والبلل ده بيكون من برة على الورق يعني مالوش دعوة بالماسورة
ودا شكله النهائي

نيجي بقى للعداد بتاع الغاز

وهو مودلين في مصر موديل كبير وموديل صغير
والصغير دا الجديد للي لسه مدخلين الغاز قريب
طبعا العداد لازم تكوني محافظة عليه كويس اوي من اي زيت يجي عليه طبعا بتنضفيه وبتقومي تلفيه عشان تحافظي على نضافته وتنضيفه يكون سهل بالنسبة ليكي في كل تنفيضة

بتلفيه بورق استريتش اللي هو ده



وبتطلعي تلفي العداد من كل النواحي وخصوصا فوق


وبعدها بتلبسيه الكافر بتاعه


انا كنت مفصلة كافر له من زمان عشان ماكنش في السوق كافر مقاسه


سي صابر افندي قال اننا مانلفش السوستة دي بالورق الحراري وتتساب كده

تابع القراءة »

تنضيف الشفاط حتة حتة بالصوووووووووووووووووووور

باذن الله هنبتدي رحلة المطبخ وبرضو حتة حتة فيه ومع بعض عشان نوصل لافضل درجة من النضافة 
وطبعا بما اننا بنضايق من مشكلة الدهون فاحنا هنبتدي باكتر حاجات بتكون مزيتة في المطبخ يعني بيطولها الزيت بشكل مستمر
فهبدأ بالشفاط والبوتجاز والحيطة بتاعته
ومواسير الغاز والعداد بتاع الغاز (للي عندهم )
واللي ما عندها هنتكلم عن انبوبة الغاز وتنضيفها
واللي معندهاش غاز ولا بوتجاز هنتكلم عن نضافة البابور
واللي معندهاش لا ده ولا ده تقوم تروح احسن اومال بتطبخ ازااااااااااي ؟

فطبعا بعد ما بنزعف السقف كشئ اساسي خلاص
هتبتدي تفكي الشفاط بالشكل ده
طبعا انا كنت لفاه بورق حراري بس انا كنت فكيته ومش قادرة اقولكم كان شكله ايه
ودا بعد الفك


شايفين الحتة الالومنيوم دي عشانها مجوفة من ورا فبتلم زيت كتير
فانا بالفها بورق حراري ولما بافكها بتكون كده زي الفل وبصراحة مش باتعب في تنضفها لاهي ولا الابواب بتاعة الشفاط من بره


باستخدم في تنضيف  الشفاط باور من ماي واي بصراحة اسرع واسهل من اي حاجة تانية بتنضف
يعني الجاز بينضف فعلا بس مش بسهولة زي الباور
برضو البنزين بينضف
وحكاية الزيت دي بتعكنن عليا صفو حياتي لان هي اه بتشيل الزيت بس طب وبعدين هاقتل الزيت بعد كده بايه والزخانيق دي هيتكوم فيها الزيت يعني شغلانة متعبة اوي

لكن الباور بجد عملي بارش بيه الشفاط كله كله وهو في الطبق البلاستيك كده واسيبه بقى زي ما يتساب ممكن اسيبه نص ساعة

وباجيب ليفة بصابون سايل واعصرها كويس اوي وابتدي امشي على الحتت اللي فيها الزيت واكون حريصة اني ما ابلش الشفاط اوي عشان الماتور ما يطلهو ش ماية ويتحرق لا قدر الله
طبعا بفرشات السنان باجيب بيها الزخانيق وانضف والله سحر بينضف بكل سهولة ومش بياخد وقت باذن الله
وبعدها باجيب اي قماشة مندية وامسح بقى الرغوة واشيل الوسخ من على الشفاط


نيجي بقى لمرحلة لف الشفاط للحفاظ عليه من الدهون
انا شوفت بنات لفاه بورق لاصق زي اللي بنلزقه على الازاز بتاعة الشبابيك
وواحدة جربته وقالت الاتي:
انه بيلزق وبيسيب علامات اللزق (يعني مش بيحافظ على نضافة دا بيعكه)
تاني حاجة انه ساعات بيتفك ودا بيؤدي انه بيعمل صوت مزعج اثناء تشغيل المروحة (يعني مش عملي ومنظر بس)

اومال نلفه بايه ونحافظ عليه ازاي
بنحافظ عليه بالورق الحراري
ودي طريقة لف الشفاط من الالف للياء ومصر تتحدث عن نفسها
هتحضري الحاجات دي
ورق حراري +لزق سلوتيب+مقص


وتقصي شريط من الورق الحراري عريض كده
وتقسميها نصين


وتاخدي واحدة منهم وتلفيها على الريشة بالشكل ده


وبتشيلي الزيادات وبتخليها اد الريشة بالظبط بتفضلي تبستفي فيها بالسنتوفة عشان لما تلف ما تعملش صوت يضايقك وانتي في المطبخ وتخرجي مصدعة وبعدها بتلزقيها بالسلوتيب كده





دا كده الريش تيجي بقى للماتور بعد التنضيف
الابواب دي
شايفين الزخانيق نضيفة ازاي




بالفها كلها بالورق الحراري




ودا الشكل النهائي


طبعا الحيطان بتاعتي مش سيراميك وكلها رطوبة
بس الحمد لله نضيفة بس كشكل مش ولا بد
ادعولي ربنا يكرمني واوضب البيت كله

تابع القراءة »

تنضيف السجادة ام شراشيب بالصوووور

النهاردة هتكلم عن تنضيف السجادة اللي فيها شراشيب
واللي بغفل عنها ستات كتير انها تخرجها بعد التنضيف بصورتها النضيفه
وان الشراشيب دي بتكون عنوان نضافة السجادة
والسجادة اللي مالهاش شراشيب تعتبر مالهاش عنوان؟
لا طبعا كل حاجة وليها عنوان نضافة
وعنوان نضافة السجادة زهواتها واطرافها لازم تكون نضيفة اللي بنقول عليها بروازها او ايطارها
نخش في الموضوع
السجادة اللي جايبة صوارها دي بتاعة اوضة العيال يعين مش نضيفة بالمرة وشراشيبها بتكون مية مية بصراحة وطبعا لازم تتنضف كويس زي باقي السجادة يعني متنضفيش الشراشيب وتسيبي السجادة زي ماهي لا ركزي ويايا 

انا فردتها وبليتها ماية كلها لحد ما اتشربت الماية كويس وتنيتها بالمنظر ده


وبعدها طبعا بابتدي اني ابوشها زي ما اتفقنا بالرابسو وماية شوية كلور الوان بس يجي نص ازازة او كلور عادي نص كوباية بس
اللي عندك يعني
وروحت مبوشة السجادة وش وقفا


وطبعا ما ننساش الشراشيب انا كمان نبوشها

شوفتوا لونها عامل ازاي مصفرة ومغمقة وبالبلا
طبعا اللي لسه داخلين ومش عارفين يعني ايه بنبوش السجادة يعني بننقعها بس مع الدعيك يا اما بفرشاة بلاط صغيرة اوي بمقشة خشنة وكله على حسب راحتك يا ست الكل
وممكن تنضفي السجادة وانتي قاعدة على كرسي واطي لو ضهرك تابعبك او ركبك لا قدر الله
ربنا يديكم كلكم الصحة يارب

طبعا بنسيبها وقت كبير منقوعة على ما تروحي تعمليلك اي شغلانة تمسحي تطبخي والشغل كتير وربنا يعينا ويعينكم ياااارب
بترجعي بقى للسجادة بعد وقت كبير وبتاخدي جزء جزء فيها وبتحطي مسحوق على الشراشيب دايركت كده

وبالفرشاة وشوية ماية في كوباية الحماية تفضلي تغسليها وتحكي بالفرشاة كويس اوي هتحسي انها بتبيض معاكي بكل سهولة


وبتتني السجادة من ناحية الشراشيب على قفاها كده وتدعكيها من الناحية التانية هتلاقيها بقت بيضة وزي الفل




بتشطفي كل جزء بتنضفيه دا لو حمامك صغير
لو حمامك كبير بتشطفيها كلها مرة واحدة وبالمساحة بتزوفي الرغوة وتكبي ماية لحد ما الماية تخرج من السجادة بيضة وزي الفل
والتشطيف زي ما قولت مهم اوي في تنضيف السجادة
لان السجادة اللي ما تتشطفش كويس بتعمل ريحة مش كويسة اثناء ما بتضفى في الحمام
دا غير انها مش بتكون مزهزهة وبهتانة
وكمان بتحسي انها ملزقة ومشضددة
يعني حاجة ماي علم بيها الا ربنا
وبعد ما بتقرب تنشف بنجيب بخاخة نصها ديتول ونصها ماية وبتعطريها كلها وبتفضل ريحتها حلوة هي والاوضة اكبر مدة ممكنة

واي استفسار او حاجة نسيتها نبهوني
جزاكم الله كل خير

تابع القراءة »

ترتيب اوضة العيال حتة حتة بالصووووووووووور

اليوم هنتكلم عن تنضيف اوضة الاطفال
اللي في الغالب بتقوم بدورين
دور كاوضة نوم للاطفال وكغرفة معيشة كمان ودا عادي جدا في البيوت الصغيرة اللي مافيهاش مكان تاني لليفينج روم
وطبعا بتكون اكتر اوضة بتتبهدل عشان بيكون فيها لعب العيال ومذاكرتهم واكلهم وشربهم ساعات
فعلى طول الحيطان متبهدلة
والباب وفرش السراير
والسجادة ع الارض
فلازم بشكل مستمر تتنضف ووتتنفض
ولازم يكون السجادة بتاعتهم غامقة وعملية عشان لما تيجي تنضفيها ما تتبهدلش منك
وكمان لازم يكون عليها ملاية اثناء الاكل او مفرش او كليم زي ما يناسبك
وطبعا عشان ننضفها لازم تكوني معودة عيالك على نظام الاكل والشرب
يعني ما ينفعش ادي لطفل صغير كوباية عصير واسيبه يسرح في قلب البيت او قلب اوضته حتى لا معلش اشخطي فيه طوخيه وخليه يقعد ويشرب عصيره على ملاية ع الارض وانتي اللي بتعودي طفلك
مافيش حاجة اسمها اصلي باقوله ومش بيسمع كلامي والسهتنة اللي باشوفها في ستات كتير
لازم يكون عندك حزم شوية
وافضلي علمي وكرري اومال هي التربية سهلة
ولا تعليم سلوكيات واداب الطعام دي سهلة
ما انا يا بنتي خايفة عليكي
وكمان بتصعبي عليا يعني افضل اقولك نضفي وظبطي وانتي اصلا مش معلمة عيالك ازاي يحافظوا على نضافة البيت من اكبر المصايب اللي بيعملوها يبقى بجد حرام عليا

طبعا احنا بننضف من جوا لبرة في الاوضة
يعني بنمسك كوامن الاوضة من تحت سراير  لادلبة لادراج وبنرتبها وونضفها كويس اوي


ترتيب دولاب العيال من الطبيعي وانتي بترتبيه بتشوفي االحاجات اللي مالهاش لازمة ومش مقاس طفلك وبتطلعيها لله
وطبعا ما ينفعش في عز الشتا الاقي فستان صيفي عمره ما هيتلبس في السقعة بيعمل ايه في الدولاب يتعان مع لبس الشتوي اللي تحت السرير
يعني الدولاب يكون فيه الحاجات اللي بتستخدميها اللي مالوش لازمة يطلع لله
واللي مش هتستخدميه كمان شهرين تلاتة يتعان تحت السرير عشان الحاجات دي بتكركب الدولاب
طبعا الدولاب بتاع اوضة العيال يعني فيه لبسهم ملايات سرايرهم فوطهم كل حاجة خاصة بيهم
ودا رف الملايات



والرف اللي بعده دا رف الاء العلبة اللي ع اليمين هي اه بتاعة تلاجة بس انا حاطة فيها الاسترتشات اللي بتتقل بيها تحت البناطيل


دا رف الاجهزة الخاصة بيا والابر والقصافات والملاقيط والمبارد الحاجات الرفايع كلها مجمعها هنا في الرف ده عشان ما ادوخش كتير  والتوك والاكسسوارات


ودا لبس ادم ومحمد
بتاع الخروج




دا بقى رف لبس الهدوم لادم ومحمد

العلبة الكبيرة فيها البناطيل واللبس الداخلي
والسبت فيه شراباتهم
والصفين اللي معوجين دول كل صف فيه هايكولات بيتقلوا بيها تحت هدومهم صف لمحمد وصف لادم
عشان مقاساتهم مختلفة
وورا ترينجاتهم وورا السبت دا البامبرز بتاع دادا



وبعدين بنخرج بقى للاوضة من برة
بنزعف الحيطان
بنشفط المراتب وبنهويها


وسوري المرتبة اللي ماطرح بي بي اي ان كان نوعه مش هنختلف
هتفكش الكافر او الجود بتاع المرتبة وتغسليه وتعطريه وتنشريه وتهوي المرتبة وهي بالكتاب وقالعة ولما الجود ينشف على يويمن لبسيها
وكمان الالواح بتاعة السراير مافيش مانع انك تنضفيها وتمسحيها
والحيطة اللي جنب السرير بتكون دايما مغمقة ماطرح نومتهم بتغسلي الحتت دي مع تنفيضة تحت كل سرير
وبتزوئي السرير عشان بين السرير حتة صغيرة فبيتحوش فيها عفر فبتنضفيه بالمقشة وترجعي تمسحية بقماشة معصورة وتنضفيها كويس


وكمان ما ننساش اللمبة وخصوصا النيون

وكمان مفتاح الكهربا

والمكتبة او المكتب او التربيزة اللي موجود عندك

او تسريحة او كوميدينو
ومالوش لازمة تسريحتهم يكون فيها برفانات والكلام ده وخصوصا لو صغيرين
سيبيها فاضية او رصي عليها لعب مش لازم تكون مطابقة لتسريحتك زي ما شوفت عند البعض



اللعب لازم تكوني مسيطرة ع اللعب سيطرة تاااااااااامة
بمعنى ان بلاش في كل حتة لعبة خالي كل اللعب في مكان واحد وياحبذا لو الحاجة دي تكون كبيرة وطويلة عشان تلم كل لعبهم
وطبعا ماهترتبي الاوضة بتاعتهم ترتبي لعبهم مش تلميهم وبس
لا بتشوفي الحاجات المكسرة واللي فيها اذى وارميها واللعب اللي صغرت عليهم زي شوخشيخة هتصدعك كمان طلعيها لله لاي طفل نونو يلعب بيها
كده اللعب هتقل والسبت هتحسي انه هياخد اكتر وياحبذا لو تحطيهم هما شخصيا جوا السبت  (حبايب قلبي )


طبعا الشباك والالوميتال ما يتنساش انه يتنضف طبعا
وكمان باب الاوضة
وفوق الدولاب لو فاضي بتمسحيه وترجعي تفرشيه حاجة ولو مرصوص فيه حاجة من فوق بتنزليها تمسحيها وتمسحي فوق الدولاب وبترجعي ترصي الحاجة بنظام
بالنسبة لابوب الدولاب من فوق ما ننساش اننا نلمعها وننضفها وقت ما تيجي تنضفي الدولاب وتلمعيه من بره ومن جوا
وكمان التليفزيون والريسفير بترابيزتهم

والحتت اللي بيتحوش فيها الرمل اللي م الجنب




بتنضفيها بفرشاة سنان او فرشاة دهان بس تكون جديدة طبعا فرشاة الدهان مش مستخدمة قبل كده


فرشاة سنان مبلولة ممنوع انا قولت اهوووووووووووووووووو
انك تنضفي الاجهزة وانتي لسه طفياااااااااها ممنووووووووع مش من سخن لبارد الجهاز يووولع
انا حذرت اهووووو
ما تجيش واحدة تنضف الريسيفر مثلا بقماشة مبلولة ماية بتخرخر وتيجي تشغله ما يشتغلش وتدعي عليااااا انا قولت اهو ونبهت
وانتي بتنضفي اجهزتك تكوني حذرة جدا
دا جهاز بنشتريه ومرة واحدة بس في عمرنا كله على راي راجل كبير سمعته وانا قاعدة في الميكروبااص

تابع القراءة »