11:18 ص
هدى سمير
كل عام وانتم بخير بمناسبة عيد الاضحى
اكيد كلنا بنغسل سنانا
بس مش الكل بيغسلها يوميا
ومش الكل بيغسلها مرتين في اليوم ع الاقل
وكمان مش كل اللي بيغسل سنانه بيقول اه هي كده اتغسلت كويس
وطبعا ماننكرش اننا دايما بنعمل اختبار لسنانا من خلال اننا بنمرر لسانا ونفضل نحسس بيها على السنان فوق وتحت ووش وقفا
واكيد كلنا الوقتي بنعمل كده وانتم بتقروا كلامي
وانا واحدة من الناس مش باقتنع بنضافة سناني بالفرشاة والمعجون بس لاني بافضل اعمل الاختبار ده وبلاقي برضو بعض الترسبات على سناني ومش باكون مرتاحة ابدا ابدا
وطبعا جربت العسل واللمون والبيكربونات وانا لا انكر فضلهم في التنضيف بس برضو باحس انها مش بتديني النتيجة اللي انا عاوزاها
طيب الحل ايه؟
الحل هو السوااااااك
انا باستخدمه بقالي سنين كتيرة اوي
ومش باقدر اني استغنى عنه كل يوم وساعات كذا مرة في اليوم
وطبعا لا ننسى انه سنة عن الرسول صلى الله عليه وسلم
والرسول عليه افضل الصلاة والسلام لا يسن سنة الا واذا كان ليها فوايد عظيمة
وطبعا انا مش هاسرد فوايد السواك هسيبكم تجربوه وتسردولي انتم فوايده
وطبعا مش هانسى الحديث الشريف
قال رسول الله صلى الله عليه وسلم (لو لم اشق على امتى لامرتهم بالسواك عند كل صلاة )
يعني حبيبنا محمد اد ايه بيخاف علينا وعلى تعبنا (يا حبيبي يا رسول الله
نيجي بقى لشرح كيفية استخدام السواك بالصور
دي صورة للسواك اللي باستخدمه ب3 جنيه ونوص
في بيتباع ب2 جنيه وبجنيه واحد بس
يعني اسعار كتيرة ومش غالي خالص
انا باستخدم الوسط يعني مش رفيع اوي زي عود الكبريت ولا تخين اوي زي الشومة
ودا شكل تاني له
طبعا بتطلعيه م الكيسة وبتحطيه في كوباية ماية تكون ربعا بس بحيث بلي جزء منه اللي تعملي بيه سنانك لانه بيكون ناشف شوية بس مش ناشف زي الخشب الجامد لا مرن وماتخافوش مش بيعور اللثة لا امن خالص خالص
بتطلعيه بيكون كده
وبتقشري الطبقة الخارجية جزء بسيط منه يادوب على اد سنانك
وبيكون شكله كده
وبعدين بتحطيه في ربع كوباية ماية كده بتاع عشر دقايق بس عشان يبقى ناعم وياكي
وبعدها بتطلعيه بيكون بالمنظر ده وبتبتدي تفرديه بصوابعك عشان يبقى زي الفرشة وشعر وكده
وتبتدي بقى تنضفي سنانك كلها وانتي بتتفرجي ع التليفزيون وانتي بتقري حاجة كتاب او ع النت وتمسكي سنانك كلها صف صف
من ورا ومن ادام وضروك وكله وبين سنانك برضو هتلاقي السواك بيطوله وبينضفه
وهتلاقي سنانك ناعمة وزي الفل
وكل يوم بتقصي الجزء ده وبتعملي حتة جديدة وتنضفي سنانك بيها مرة او مرتين في اليوم
وطبعا بعدها بتتمضمضي وتتغرغري وتاكدي انك مش هتلاقي ريحة نفس وحشة خالص باذن الله اللي بتخرج من الفم بسبب السنان
وكمان السواك بيشيل الجير من ع السنان دا للناس اللي عندها جير ودايما الجير بيتراكم
انا باعمل بالسواك سناني وبعدها باغسل سناني بالمعجون عشان يديني الانتعاش بتاعه وكمان يبقى ريحة بوقى معجون
وطبعا ما ننساش االعسل النحل للسنان مفيد جدا و عن تجربة
انا كان دايما اللثة بتاعتي تجيب دم بمجرد اني اغسلها بالمعجون ومن بعد ما استخدمت العسل النحل مع المعجون الحمد لله ما لاقيتش الحكاية دي تاني خالص
وطبعا توفيرا للعسل وانه ما يبوظي انا حطيت كمية بسيطة في قاطرة العين بعد ما نضفتها كويس حطيت العسل فيه وكل يوم الصبح احط شوية على المعجون وانضف سناني
وكمان البيكربونات برضو بتبيض السنان وبتطهرها بس انا باعملها مرة في الاسبوع مش دايما وحاطة شوية بيكربونات في علبة كريم نضيفة وحطاها في الرف بتاع الحمام
ودي صورة قاطرة العسل وعلبة البيكربونات
وكمان باعطر بوقي بقرفة
انا طاحنة القرفة في مطحنة وواخدة شوية قرفة وحطاهم في علبة نضيفة في الحمام برضو باغمس الفرشة مندية فيها وامررها على سناني بيطهر الفم واللثة والسنان
ودي صورة ليها
دا غير اني سمعت عن الفانيليا في تنضيف وتعطير الفم بس انا ما جربتهاش بس امي كانت جربتها وبتقول عنها ممتازة
وبالنسبة لموضوع السنان اللي الكل بيشتكي منه بسبب اللون
يعني في ناس طبيعة سنانها اصلا صفرة ولا يمكن تفتح وبيحاولوا يفتحوها بشتى الطرق
عاوزة اقول حاجة كان دكتور قالها
ان الوان السنان دي زي الوان البشرة يعني في ناس سمرة وبيضة وزنجية برضو السنان كده في منها اصفر بدرجاته وابيض ناصع بورسلين
فطبعا الحاجات دي عمرنا ما نقدر نغير في الوانها غير بالتكنولوجيا الحديثة وطبعا بيكون ليها اثار جانبية
اتمنى يكون الموضوع عجبكم
وهاستنى التقييم
على حسب طبعا تقديركم للموضوع
في امان الله