التنضيف الشهري لدرفة الخزين في دولاب المطبخ

طبعا  مع بداية كل شهر
كل بيت يكتب مستلزمات البيت الشهري
من منظفات
لحاجة البقالة جبن لخزين زيت مكرونة رز وما شبه ذلك
وخزين وتفريز في الفريزر لحوم واسماك وخضار للتفريز لو رخيص للتوفير
انا كنت كاتبة قايمة بالمنظات والاك
وروحت واشتريتها ولما رجعت مسكت كل رف نضفته قبل ما ارص فيه عشان يبقى شغل على ماية بيضا

شايفين ازازة الكلوركس دي

عجيييييييييبة بجد

بتنضف السيراميك والدهون واي حاجة مش نضيفة تقابلك بجد ممتازة

هي وديتور برضو مطهر ومزيل للاوساخ ممتاز حطيت منه في بخاخة وشوية ماية بسيط واي حاجة مش نضيفة بينضفها

 هنا رصيت المنظفات كها
طبعا سطر البخاخات لا غنى عنه
بخاخة معطر
وبخاخة للموبليا
وبخاخة للازاز
وبخاخة للبوتجاز
وبخاخة للجاز
بجد مشروع البخاخات ده مشروع قومي هاااااااااااااااايل
بخاخة لكل مواطن
وطبعا كلور بيكفيني 4 ازايز طو الشهر
وازازة كمفورت معطر
وواحدة كلوركس الوان بس كل شهر كفاية اوي
بحط المسحوق ف الجردل الازرق ده مش بسيبه في كيسه عشان الزحمة واسهل لما اجي اخد منه
والجردل الصغير الاصفر ده فيه زهرة زرقة ومستر ماسيل للتواليت ورا وبودرة الصراصير

وصان لايت باغسل منه المواعين
وبشرت نص واحدة وجربتها في غسيل الابيض ممتازة فعلاااااااااااااااااااا

 هنا بقى جزء من الخزين والباقي حطيته في السباتة المكرونة والملح وغيره

 دي بقى اوضة نومي المتواضعه
بعد ما نفضتها

ودي السجادة بعد ما حكتها ع الناش ومكنتش لسه لميتها عشان اهويها

تابع القراءة »

ازاي المع حلل الالومنيا بالصووور وانواع سلك الالومنيا واستخدامتها

 

 

 

 

 

لما كنت كتبت موضوع بتاع ازاي نوفر في الصابون السايل كتير من العضوات سألتني 

طيب مادام اتكلمت عن الليف والاسفنج واشكاله

ليه ما اتكلمتيش عن السلك الالومنيا وكتير اشتكوا انهم مش بيعرفوا يلمعوا الالومنيا زي ستات زمان

طبعا انا قولتلها باذن الله هعم لموضوع خاص بكده

طبعا اغلب الستات مش عارفة تلمع الالومنيا زي امهاتنا وجدتنا

والكل يتساءل هل ده عيب في الالومنيا بتاعة اليومين دول ولا ايه ولا دا غباء من الاخرين

ومهما الواحدة تفضل تدعك وتتك اوي في الحلة برضو مش حاسة انها مدية الوميض اللي كانت بتشوفه وهي صغيرة

السؤال بقى بيطرح نفسه 

ايه السبب؟

السبب هو الصابون السايل 

اه الصابون السايل لما بتيجي تحطيه ع السلك الالومنيا وتفضلي تدعكي لحد ما دراعك يقف وبرضو مش بيلمع لان السلكة بترغي اوي وبتجري في الحلة احنا عاوزين السلكة تعصلج في الحلة 

وكانوا ستات زمان بيستخدموا الصابون الاسود او الاخضر اللي مالوش ريحة

وطبعا اليومين دول يكاد ان يكون انعدم وعشان تنزلي تجبيه لازم تلفي في الاسواق الشعبية وممكن تكون بعيدة عن مساكنكم

 

طيب في حل تاني

اكيد في حل ويا سلام عليه احسن من الصابون الاسود مليون مرة ع الاقل هيحافظ على نعومة ايدينا

وكمان لونها

ما هو احنا لما بنيجي نغسل بسلك الومنيا وكمان صابون سايل تلاقي صوابع ايديكي بقى لونها اسود وخصوصا في الاركان بتاعة الصوابع

نيجي بقى للصور

دا السلك اللي بيتباع في الماركتات في منه الغالي اللي بيعيش ومش بيصدي وبيتباع الواحدة بوحدتها ب3 جنية ونوص تقريبا وفي الرخيص اللي بيتباع كذا واحدة مع بعض وهاشة كده وبيتباع 4 يا 5 ب2جنية ونوص تقريبا

مش متذكرة اوي الاسعار دي ماتغسليش بيها الالومنيا عشان بتجرحه وبتعوره

دي يتغسل بيها الاستنلس والحواف بتاعة الحوض والسيراميك حلوة بتمرش كويس الاماكن دي

 دي بقى مثال ضيق لغطا الحلة اللي مش بتلمع معلش الحوض متبهدل نا وقتها كنت باغسل المواعين فالدنيا متبهدلة

 ودا الصابون ابو ريحة ممكن تستغلي اخر الصابونة بدل ما ترميها خديها المطبخ لمعيلك بيها حلتين

 دا بقى السلك اللي هتستخدميه في غسيل الالومنيا انا باجيب كمية واقصقصها وارصها في علبة وباغطيها وباعينها في التربو او الاسبتة زي ما تسموها بس هي قربت تخلص وهبقى اوصي سي صابر اول الشهر يجيب باذن الله

 دي بقى الحلة بعد ما تغسلت

 في ناس بعد ما بتغسل الحلة بتسيب حوالين الدواير دي مش نضيفة بالرغم من انها بتلمع الحلل كويس اوي وبتخليها مرايا بس تيجي تشوفي دي تقولي يعني ماكنش هاين عليها تديها تنضيفة برضو مرري عليها السلكة كده بشكل دائري هتنضف بسرعة مش محتاجة تأني اوي

 هتنضف وهتبقى كده

 برضو الحتة بتاعة الايدين دي ساعات بيبقى فيها صفار واوقات لا قدر الله بتقلب لسواد الشر برة وبعيد
انا عارفة انكم كلكم زي الفل بس انا بس باذكر

 ودي شكلها من قريب

وماتنسيش عشان تحافظي على ايديكي ونعومتها بقي اغسلي ايديكي ورطبيها باي كريم عندك وادعكيها بنص لمونة عشان تبقى بيضة وزي الفل

اتمنى يكون الموضوع عجبكم وياريت اقدر افيدكم باي حاجة

واقعدوا بالعافية

تابع القراءة »

تنظيم ورص النيش وتنظيم وترتيب مكتبة الاطفال

انا رتبت مكتبة الاطفال بالشكل ده

  ودا بقى رص النيش دي الدرفة اللي ع الشمال فوق

 تحت

 ودول الدرفتين اللي ف النوص فوق

 تحت

 هنا الدرفة اليمين فوق قولت اما احط الفنجان مكبوب كده زي ما بتعملوا

 تحت

تابع القراءة »

بعض الافكار لتنظيم غرف الاطفال ولم كراكيبهم

تابع القراءة »

ازاي نتغلب على كركبة ادوات الدراسة وعدم ضياعها بالصووور

طبعا كلنا بنصحى الصبح عشان نلم اوضة العيال او البيت بنلاقي ادوات المدرسة الرفيعة دي في كل ناحية


شوية قلم هنا مسطرة لا برجل لا استيكة كوريكتور وغيره وغيره
وطبعا لما بنيجي نلمها ونحطها في الادراج بتروح في وسط الحاجة ومش بنشوفها
طبعا الحاجات دي بتروح وبتغيب عن عنينا وبنضطر نطلع بدلها جديد عشان ننجز في عمل الواجب
دا بعد طبعا ما بنفضل ندور عليها كتير وبناخد وقت اكبر
وياسلام بقى لو كل واحد يقلب درج التاني عشان يلاقي الحاجة دي وبتبقى خناقة وتفضلوا تصوتوا فين الاستييييييييييييييييييييكة
فين القلللللللللللم

وبتبقى مسرحية عمل الواجب

فخالتي فكرت وعملت علب وزينتها بشكل بسيط وقالت ان اي حاجة رفيعة خاصة بالمدرسة تحطها فيها
زائد طبعا دبابيس الطرح الخاصة بالمدرسة برضوبتكون متنطورة في كل مكان والصبح البنات بتدوخ عشان تلاقيها

تابع القراءة »

طريقة استخدام الاسبيتاج او الاسبيداج في تنضيف الدهون والوسخ

 انا عاملة الموضوع دا مخصوص اهداء وشكر وعرفان للجميل للاخت ياقوتة حرة
بجد باقولها شكرا
وكل حد هيدخل ويجرب الوصفة الجميلة دي هيدخل يقولها شكرا
شكرا لكل حد عمل حاجة كويسة
وشكرا لعم بدير اللي اشترى الكولدير

 ندخل بقى في الموضوع
كانت الاخت ياقوتة حرة عملت موضوع بالعنوان ده

وكان حصل على تميز كبير وبجد كلنا وبلا استثناء اول مرة نعرف الاسبيتاج ده الا منها ومعرفناش فوايده الا منها
جزاها الله عنها كل خير
اولا الاخت ياقوتة قالت ان الاسبيتاج ده بيدوب الدهون بشكل جميل وسهل د بجانب انه رخيص في السعر
طبعا عشان نعرف اول حجة ان الاسبيتاج ده بيتباع عند عمو البوهيجي الللي بيقولوا عليه بتاع الحدايد والبويات الكيلو ب1 جنيه بس
وبيتباع بشكل اسهل عند اي عمو بيبيع الاسمنت والجبس والذي منه
طب عشان برضو يبقى عندنا ثقافة الاسبيتاج ده اصلا بيتعمل بيه ايه؟
كما سالت سي صابر افندي جوزي قالي انه النقاشين والاسطوات بيستخدموه في عمل وش معجون للحيطة كبديل للمعجون الجاهز وبيضاف عليه زيت وبس
طب دا شكل الاسبيتاج كم موضح في الصورة

 خدت منه كوباية كبيرة وضفتها على بتاع لترين ماية وضفت قليل من الفيري يعني ماكترتش لان ياقوتة قالت انه هيرغي ونضيف خل فانا قولت ما اكترش واجرب والعب في ملعبي

 جبت كافر الشفاط اللي كله زيت ويادوب من غير م انقع حطيته وبفرشة البلاط بس مرشته مرشة واحدة بس لاقيت الدهون نزلت بشكل سريع

 وبقى كده من غير ما كنت لسه لا غسلت ولا اتكيت ولا حتى جبت الزخانيق دا منظره بعد دقيقة واحدة من انه بس طال من ماية الاسبيتاج

 نيجي بقى للهم الناقع عند كل واحدة عشان ايدينا بتتعور وبتتخربش ساعات من حمالات البوتجاز حمالات الهموم وخصوصا الاركان انا جيت اعملها كده بماية الاسبيتاج مانضفتش بسهولة زي وش الشفاط قومت انا جبت الاسبيتاج المترسب في قاع الطبق وحطيتها في الزخانيق وسبتها برهة من الوقت ورجعت بفرشاة المعجون وادعك فيها

 لحد مابقت كده

 وبعدين انا نضفت برضو بيها كل مايطوله المطبخ من دهون وكمان نضفت بيه الحمام وخلى السيراميل بروبرق
وبجد كان ناقص اعمل منه ماسك على وشي (بس دي طبعا دعابة مني اوعى حد يعمل كده او يفكر يعمل منه صنف حلو او كيكة حتى ) هذا المنتج غير صالح للاكل


وهي دي حكايتي مع الزمان
ومع الاسبيتاج
ومع ياقوتة
جزاها الله كل خير
وشفى الله زوجها وبارك لها في عمره
وبارك لها اولادها وبيتها الجميل وصحتها باذن الله
آمين آمين آمين

تابع القراءة »