يناير 2011 ~ تنضيف البيت

السلام عليكم ورحمة الله وبركاته
حبايب قلبي رجعتلكم من جديد
ولازم يبئا معايا جديد في كل جزء وده زي ماعودتكم عشان محدش يزهق مني

وباذن الله الجزء ده هيكون مختلف لان في ناس كتيرة جديدة دخلت معانا وكلها حماس ومشاركة وتفاعل وبجد الموضوع جميل بيكم
وانا باحبكم كلكم ف الله
عاوزة اقول ان الموضوع ده مهم جدا لكل ست مش عشان هو موضوعي .........لا دا عشان انا اول واحدة بتستفاد منه
كمان باحس ان موضوعنا ده شامل
يعني عشان اوضح اكتر
كنت قريت من فترة في احصائئيات عالمية
ان المشاكل الزوجية بتنحصر تحت 5 بنود
طب ايه هي البنود دي؟؟؟؟؟؟

المادة الفلوس وده وارد في كل بيت معظم مشاكلنا بتكون سببها الفلوس
العمل شغلك انتي او شغل جوزك طبعا مشاكل الشغل دي متشعبة من غيرة لشك لاهمال لغيره
الاطفال طبعا دي مش عاوزة كلام
العلاقة الحميمة فتور الستات ونفورها وبعد الست والراجل عن الموضوع ده بياثر جدا في العلاقة الزوجية وممكن لا قدر تسبب طلاق ومعظم البيوت السعيدة وفيها حب ودفا بتبدي النقطة دي ومش عاوزة اغوص فيها عشان في اخوات كتير اوي كاتبة في الكلام ده في قسم العلاقات الزوجية وشغالين شغل طيب وزي الفل اللي عاوزة تعرف وتتعلم تاخد بعضها وتروح هناك وتتعلم ........ب3 صاغ مجلة ما تزوقيني يا ماما صفحة مليون و300 الف
شغل البيت ودي ملعبنا في قسمنا وجروبنا جروب نضفني شكرااااااااا

وسيبكم برضو احنا الموضوع هنا بيناقش بعض من تلك الامور
ونحاول بقدر الاماكن احنا اللي نمشي امورنا في بيوتنا ونحاول اننا نظبط حياتنا
طبعا مفيش حد خالي من المشاكل وكلنا مشاكل .....بس انا اقصد اننا نتفادي المشاكل الكبيرة
وفعلا زي ما بيقول اي راجل الست باديها انها تخلي البيت جنة وباديها تخليه نار
برضو في شغل البيت....بايدك تتنشطي وتخلي بيتك زي الفل وبايدك تخليه مش زي الفل
كمان الاخوات اللي بتشتكي من كركبة البيت طول اليوم ومش بتلحق تعمل حاجة بسبب العيال وكبر المسؤلية عليها دا غير انها مهملة في نفسها يعني تقريلها كلامها تبئي مش عارفة تعيطي عشانها ولا تنصحيها بشوية شد ودان

ولا تنطيلها من الشاشة وتنضفي مكانها ولا تعمليلها ايه
بس انا مش باتريق طبعا .....لان كلنا وانا منهم اوقات بمر بنفس الظروف دي
ساعات احان كستات بنمرض وبنسيب البيت فترة مش بنشتغل فيه ونقوم من العيا طبعا شكل البيت بيكون شبه الزريبة
طب الاخت دي انا اقولها ايه(اخت يعني ساي من الناس)
عاوزة اقولها تحط بعض الاعتبارات في ذهناها

لو عندك عيال حطي في دماغك ان البيت لازم يكون متكركب وده مش معناه انه مش نضيف اقصد كركبة لعب وكركبة ناتجة عن العيال ده عادي جدا وطبيعي متحطيش في دماغك المهم يكون في اوضة يلعبوا فيها بحيث ان الكركبة بتاعتهم محاصرة في مكان واحد ونحاول بقدر الامكان اننا نعود العيال انهم يلموا اللعب بعد ما يلعبوا ووده بيبدأ من 3 سنين بيبتدي الطفل يتعود خلاص انه يلم اللعب وكل وحدة وطريقتها في التربية وتعويد طفلها على اي عادة كويسة يسلكها في حياته اليومية
عاوزة دايما الاهتمام بكوامن البيت ده هيشعرك دايما انك متدفيه او ان قلبك مستريح وان ضميرك سعيد طب ايه هي كوامن البيت؟؟.......زي تحت السراير الدواليب الادراج المراتب نضيفة الستاير نضيفة ونحاول كل شهر نعيد ع الحاجات دي ولو كل شهر بتعملليها هتلاقي ترتيبها سهل وبسيط
الصبح بدري بتاخدي شاورك المعتاد وبتتسرحي ولو جوزك في الشغل بتضربي وشك ماسك زائد انك بتلفي شعرك ووتربطي الارطة وتبتدي تشتغلي في البيت ادي العناية بنفسك مش بتاخد في ايدك حاجة ولو بتعملي لنفسك كل يوم نص ساعة تعملي فيها حاجة لنفسك مش كتير عليكي ومش لازم تعملي كل حاجة في نفس اليوم يعني يوم نعمل ضوافرنا لا يوم ننضف ودانا لا ما اعرفش يوم نعمل سويت لايد وشوية لرجل لا شوية لحاجة تانيه
كمان بلاش نكركب كل حاجة فوق دماغك عشان حالتك النفسية وعلى فكرة شغل البيت بيكون عاوز بال رايق ومزاج يعني عالي الطاسة الاول واعملي دماغ عالية وبعدها اشتغلي في البيت ونظمي وقتك
عاوزة اقول برضو الورقة والقلم له عامل كبير اوي في تنظيم وقتك ودايما تكتبي اللي انتي عاوزة تعمليه وكله بمشيئة الرحمن